Da gudagnar ina pluna bels premis... dumondas sin p. 19. giuventetgna fin uniuns da sfratgar e zunghegiar. commembers.

Transcription

1 annada 13 // Glion // pretsch frs. 45. /onn punts Nr. 154 avrigl 4/2007 Da gudagnar ina pluna bels premis... dumondas sin p dad uniuns da giuventetgna fin uniuns da sfratgar e zunghegiar da presidents e commembers. Tgi è la GiuRu?

2 Cuntegn nr. 154 uniuns da giuventetgna da Silvana Derungs ed Ursin Lutz 8 romania da giuventetgna da Silvana Derungs 10 uniuns 11 mes Tracks 15 Fumetto da Jon Bischoff 15 Giuru preschenta da Sara Hermann 16 Editorial da Martin Cantieni 2 las punts politicas da Roman Liesch e Jon Pult 12 In unitad da Carin Caduff 17 Intervista cun oliver nyffeler dad Ursin Lutz 3 rezia forever da Fadrina Hofmann 4 senza tecnica va nuot a pigniu da Flurina Cajochen 6 1. finamiras: Sfraccar e zunghegiar dad Ursin Lutz 7 ti vuls savair da Flurina Badel 13 one year in paris dad Anna Serarda Campell 13 la soap da Tinetta Rauch 14 che vita da chans da Fadrina Hofmann 14 S annunziar ussa per la Sessiun dals giuvenils GR Urs paul encunter la Romontschia da Martin Blumenthal 18 container Engiavinera impressunm 19 ord la quotidiana 20 Editorial da Martin Cantieni Il president fa in cordial bainvegni a tut ils lecturs. I fetschia plaschair che tants sajan vegnids oz, malgrà la bell aura, fin tar l editorial (l actuar guarda sin l ura e noda il temp). Tut tenor partida politica e caracter persunal dal president suonda in monolog lung u pli lung da pauca relevanza. Lezia da l actuar èsi da nudar qua e là in chavazin positiv che mussa sia loialitad cumplaina envers il president. Suenter questas pèr preliminarias pon vegnir elegids ils dumbravuschs; il president ha gia fatg la saira avant ils patratgs davart las persunas, ils pertutgads infurmads avant che la sesida cumenzia vegnan uss elegids unanimamain. Il president sa legra che la sesida avanza cun tal tempo e lascha era savair quai ils preschents cun purtar in witzin. In pèr rian or da loialitad cun il president. Tractanda 3: l ultim protocol. Quai è il grond mument da l actuar. El prelegia il protocol cun tun monoton. Remartgas? Correcturas? In vuless gugent far ina correctura, gughegia pèro betg. In auter ha pli paucas retenientschas; el na vul betg tegnair in grond pled, però tuttina prender la chaschun da suttastritgar anc ina giada en paucs pleds, senza curreger, simplamain far attents ad in, dus puncts ch al paran impurtants. Il president engrazia. Ils auters suprastants n han anc ditg nagut e sesan en loialitad enturn il president, be l actuar scriva puspè. Il president vul gist cumenzar a quintar cun grond elan da l onn passà, cur ch el bada ch el stuess anc laschar approvar il protocol. Quai vegn fatg unanimamain. Ils dumbravuschs conferman cun dar il chau. Uss vegn preschentà il quint cun projectar las tabellas vi da la paraid. Entant ch ils commembers 5, 9, 10, 11, 12, 16, 19 e 21 studegian anc tge che la terza colonna pudess signifitgar, mida il cassier gia la folia e preschenta il medem preventiv sco l onn passà. Commember 15 vuleva atgnamain dir che la suprastanza haja sfarlattà daners e dumonda, suenter ch el ha survegnì il pled dal president: «Quels divers custs tge è quai exact?» Il cassier di insatge, quel che aveva dumandà «aha, gie» e sesa puspè giu. Duas uras pli tard è la sesida a fin, il president giavischa in bun return a la lectura da las PUNTS e sa legra gia sin la proxima radunanza.

3 Intervista cun Oliver Nyffeler il nov president da la GiuRu dad Ursin Lutz A chaschun da la radunanza generala da la GiuRu che ha gì lieu il schaner 2007 a Bravuogn è Oliver Nyffeler vegnì elegì sco nov president da la GiuRu. PUNTS ha discurrì cun el davart ses plans e sia persuna. Uei Olli, gratulaziun per tes nov post. Ti es uss pli u main il pli impurtant giuven en la Rumantschia. Tge sentiment è quai? Grazia, uschia n hai jau anc betg vis quai. Ma i fa en mintga cas impressiun dad udir talas chaussas, tut en tut in fitg bun sentiment. La nova suprastanza da la GiuRu (da sen. a dretg): Martin Cantieni, Annatina Nay, Anna Rauch, Gion-Andri Cantieni ed Oliver Nyffeler. Co sa mida la GiuRu cun tai sco president? Quai na dependa betg mo da mai. La nova suprastanza decida tge che mida e tge betg. Ma la direcziun ed il svilup dals ultims onns constattan, pruvar da far memia bleras midadas en la situaziun actuala fiss fallà. Tge acziuns èn gia planisadas per quest onn? Planisads en in u l auter workshop, festas, activitads cun autras minoritads, participaziun al SUFO (Sozial- und Umweltforum; remartga da la red.), in project per l Open Air Lumnezia, forsa in teater ed anc bler auter... La GiuRu ha vaira blers commembers, però be paucs che s engaschan. Tge quintas ti da far cunter quest problem? Quai è in da quels problems che nus discutain adina puspè, e la soluziun es vairamain simpla. Persvader noss commembers che engaschament per la GiuRu n è betg in stuair, ma anzi in activitad che fa plaschair, che fa senn e che serva a mintgin che sa participescha. Tgi che nun ha mai pruvà manchenta insatge. In intent central da la GiuRu è da colliar la giuventetgna rumantscha da las differentas regiuns. Cuntenta la situaziun actuala? Na. I dat uniuns da giuventetgna che realiseschan quants avantatgs ch ina collavuraziun surregiunala ha, memia bleras però na pensan betg sur il cunfin da lur agen vitg ora. Uss anc in zichel tar tai sco persuna privata. Ti es naschì a Turitg e tes num na tuna era betg fitg rumantsch. Pertge es ti tuttina in vair Rumantsch? In vair Rumantsch na sa mussa betg tras sia derivanza u tras ses num. In dretg Rumantsch sa mussa plitost tras si identificaziun cun la lingua e cun la cultura, e quella è tar mai gronda avunda per ma numnar «in vair Rumantsch». Forsa è il fatg ch in «Unterländer» s engascha per il rumantsch perfin ina motivaziun per auters giuvens. Sin la pagina d internet da la GiuRu (www. giuru.ch) vuls ti tradir nagut u be pauc da tia vita privata. Tge datas e cifras tradeschas als lecturs da PUNTS? Mia grondezza da chalzers: 43. Basta quai? OK, in pau dapli: Oliver, 21 onns, student, da chasa en ina WG a Winti (il caos pur), baiva biera, legia PUNTS... Sin san ins era leger il suandant sur da tai: «Bainbaud less jau ir en viadi tschintg u sis mais (sche pussaivel tut il mund). Suenter quai dun jau si mia lavur tar la banca, vegn ad emprender il saut da step e vegn sin turnea cun Riverdance. Suenter quai cumprel ina pitschna ustaria a Cuira e m lasch pensiunar (cun 31 onns). Per dapli infurmaziuns am pos telefonar u scriver ina carta (giuvnas tranter 18 e 23 vegnan preferidas).» Il viadi enturn il mund has ti realisà dacurt. Tge novas experientschas has pudì rimnar? Pos forsa quintar in interessanta anecdota da tes viadi? Es turnà gugent? Jau stoss dir ch jau hai passentà durant quels tschintg mais en viadi in incredibel bun temp. Anecdotas datti tantas ch jau na savess gnanc nua cumenzar a quintar. Tras in tal viadi vegn ins automaticamain pli avert, ins vesa bler or 3 d ina autra perspectiva, pli flexibel, pli spontan. Insatge dal pli impressiunant è franc la glieud ch ins emprenda d enconuscher per part naschan contacts che vegnan a restar anc per onns. Turnar era extrem grev. Jau sun arrivà a Turitg e m hai ditg: «OK, bel qua, ma quai conusch jau già, jau vom puspè!» Valan tes ulteriurs plans anc? Saut da step, ustaria a Cuira e la pensiun cun 31 onns... Ils plans sun anc pli u main ils medems. Jau ma sun però decis da studegiar anc per trais onns, per avair in bun fundament... E co statti cun las giuvnas? S annunzian bleras giuvnas tar tai per dumandar dapli infurmaziuns? Brevs, mails, faxs, telefons... Jau na tegn gnanc pli pass a dar resposta... Tia filosofia da vita? I vegn bun... Per finir anc tschintg chavazins. Tge ta vegn endament spontan tar quests? - GKB - Passà - ukulele - Suenter tschintg mais exercitar sai jau dus accords - Chatrina - mia presidenta preferida - Ahoi Brause - mal il chau - nettegiar chalzers - sto esser mintgatant

4 Rezia forever da Fadrina Hofmann v/o Corviglia Amicizchas grazcha a l uniun da students rumantscha...ca Rezia ün lö per flots inscunters... CA Rezia eu m algord amo cur ch eu n ha vis pella prüma jada a quist puogn plain students rumantschs culla bindera cotschen-alb-verda, ils bindels e la chapütscha illas istessas culuors e l slogan «Stai si defenda!» I d eira il di d infuormaziun a l università da Friburg, e meis prüm impissamaint d eira: «Che es quist per ün club?». Eu sun lura listess ida a dar ün tschüt pro lur prossem inscunter in gövgia saira. I d eira mia prüm eivna illa nouva cità, a l uni d eira tuot amo magari caotic, ed id ha fat simplamaing bain da passantar üna saira pachifica bajaffond e fond skerzs in rumantsch e chantond chanzuns ch eu cugnuschaiva fingià daspö l infanzia. Corviglia - perche na? Pacas eivnas plü tard suna gnüda battiada üna seguonda jada in mia vita. Eu n ha survgni ün uschedit «vulgo», ün nom per l uniun da students. Corviglia n haja nom, ed eu nu sa amo adüna na perche. Corviglias sun utschels da las Alps, bes-chas fich socialas, magliadrunas ed acrobatas i l ajer. Cun quai saja viver eir scha l associaziun cun mia persuna am manca amo adüna. In fuond survain minchün ün nom chi s affà. Il nom es d üna vart ün simbol chi muossa chi s appartegna pro ün uniun, da tschella vart dvainta cun ün vulgo il contact plü simpel cun oters commembers dad uniuns 4 da students svizras ed eir tanter pêr. Tuots sun simplamaing per «tü», independentamaing da l età o dal status social. Eu sun uossa da la partida daspö bundant tschinch ons, ma eu nu cugnuosch amo lönch na a tuot ils Rezians e tuot las Rezianas. Illa Rezia s aintra nempe sco student e s resta per vita düranta schi nu s sorta güsta ufficialmaing per motivs privats. Dal fux al bursch I dà differents stadis da Rezians, cumanzà pro ls activs chi s inscuntran üna jada l eivna a Friburg i l hotel Elite, als semi-activs chi nu sun in fuond plü students, ma nu s saintan neir amo vegls avuonda per rivar pro ls uschedits «Altherren». Quels sun vairamaing ils finanziaders da la Rezia, quels chi pisseran cha l Activitas possa organisar ün o tschell occurrenza ed üna jada l on ün pitschen viadi. Ils «signuors vegls» appartegnan pro la Rezia Veterana ed han lur agen program da l on. La ierarchia da las uniuns da students svizras es magari cumplichada, e chi chi s interessa per quella dess il meglder ir a dar ün cuc sün La ierarchia illa Rezia invezza es plütöst üna chosa pragmatica. I dà ün schef, ün «senior» (chi nun es vegl, ma chi organisescha las activitats dal semester), i dà ün consenior (chi ha da controllar las finanzas) ed ün fuxmajor (chi d es respunsabel pels nouvs ils fuxs). Cur chi s aintra ill uniun as vegna fuxifichà, lura s esa ün fux e davo la burschificaziun as dvainta ün bursch eir

5 ... Chantar da cumpagnia tocca pro Rezians e Rezianas...Las chapütschas muossan pro che uniun cha tü appartegnast... las damas s inclegia (chattaiva fingià adüna grondius). Per detagls fetscha eir quia ün linc: Chattar amis ed eir ün o tschel antitip Eu sun vairamaing ün tip anarchic. Structuras strictas chaschunan pro mai üna resistenza interna. Illa Rezia nun haja per furtüna na gnü da resguardar reglas severas o cumonds da suringiò. Anzi, ils Rezians sun ün pövelet agreabel. Üna jada l eivna s inscuntran ils Grischunais, chantan, fan gös o tavellan da quai chi d es capità dürant l eivna. Ils commembers e las commembras fan differents stüdis, ed i fa bain d avair contact eir tanter las facultats. Chi chi stübgia il listess rom baratta infuormaziuns e notizchas. Agüd vicendaivel fa part da la filosofia da la Rezia eir davo il stüdi, pro la tschercha da la lavur, per exaimpel. Da las occurrenzas ufficialas dal StV (Schweizerischer Studentenverein) nu d eira però mai inchantada. Eu n ha bainschi fat flottas cugnuschentschas cun students da tuot la Svizra, ma displaschaivelmaing eir cun blera glieud chi correspuonda al clischè da las uniuns da students, dimena cul tip conservativ, bavader, macho cuort: meis anti-tip. Illa Rezia invezza n haja chattà a duos da meis meglders amis, e quels sun restats eir davo il stüdi. Puntists sun eir Rezians Sch eu pens uossa inavo al temp a l uni, pensa automaticamaing eir a la Rezia. Eu pens a cuorsas d orientaziun illa cità veglia, a bogns da peis ill aua fraida dal flüm Sarine, a tschainadas cun open end ed a Niculaus extraordinaris. Ils Rezians d eiran preschaints al cumanzamaint da mia carriera a l uni ed eir a la fin. A mia festa da licenziat suna cumparüts, cun chapütscha, bindel ed ün regalin e forsa eir cun ün zich baja ch üna Reziana ha conclüs seis stüdi. Eu n ha adüna gnü cumistorgia da la Rezia pagnia dürant meis stüdi, n ha adüna savü ingio ir per cussagls. Minchatant am spüzziva bainschi dad ir als inscunters da la gövgia saira quai es però pro tuot quai ch eu n ha da far regularmaing. Verer las fotografias da nossas activitats svaglia uossa fingià ün zich nostalgia. I d eira ün flot temp cun bleras risadas, cun buns discuors e stupenda glieud. Dal rest, eir ün o tschel ex-puntist es Rezian, nun Motorign? In quel sen: Stai si defenda! Cumanzà ha tuot dal 1939 cull Academia Rezia. Il böt da l academia d eira da s-chaffir e finanziar üna professura rumantscha a l università da Friburg. Fin cha la Corporaziun Academica Rezia ha pudü gnir fundada dal 1957 s han ils students rumantschs chattats minch eivna per discuorrer davart la cultura e la lingua rumantscha. Our da l academia es dvantà ün center d inscunter per vita grischunaisa. Als 8 da gün 1957 han ils students rumantschs pudü tour part a la prüma prelecziun da professer Alexi Decurtins v/o Crap. Il böt da cultivar la cultura e las chanzuns rumantschas a Friburg es restà fin hozindi. La CA Rezia es renomnada pro las otras uniuns da students svizras impustüt pervi da seis chant in rumantsch e talian. La devisa da l uniun ha nom: STAI SI DEFENDA! 5

6 senza tecnica va nuot a Pigniu da Flurina Cajochen Malgrad ch il vitget da Pigniu dumbra mo 40 habitonts, eis ei da sesmarvigliar da sia gronda quantitad d uniuns. Denter auter posseda Pigniu in club da judo ch ei vegnius fundaus alla radunonza generala dils 11 da december 1999, denter auters digl iniziant e trenader actual Lorenz Alig. Figura da fierer «Sasae-tsuri-komi-ashi» Pil mument separticipeschan 13 giuvens e giuvnas activamein al trenament da judo. La gronda part d els habitescha a Pigniu, denton dat ei era commembers da Rueun e dil cantun Appenzell dadora. Aschia ei l Appenzellesa Eliane Efinger cassiera e fuorma ensemen cun il president Renato Alig ed igl actuar Rino Cavigelli la suprastonza. Las donaziuns per saver finanziar l uniun retscheivan els entras contribuziuns dils commembers e da fauturs. La vischnaunca sezza metta a disposiziun gratuitamein la localitad da trenament. Lorenz Alig trenescha las giuvnas sportistas ed ils giuvens sportists ina gada ad jamna, mintgamai la sonda sera denter las e las ed introducescha els egl art d attaccar e da sedefender senz armas. Lur trenament vesa ora suandontamein: All entschatta vegnan las giugadiras scaldadas cun differents giugs, silsuenter suonda empau «streching» e la fin finala succeda igl aschinumnau trenament giun plaun. Igl emprem miez onn suenter las vacanzas da stad sepreparan els sin ils examens dallas tschentas, il secund miez onn muossa il trenader la teoria dil cumbat e tecnicas per la defensiun persunala. «El center stat il moviment e la fascinaziun dil sport asiat, in sport per tgierp, spért ed olma. La fascinaziun dil judo ei il fatg che la tecnica ei pli impurtonta che la forza», aschia il president Renato Alig. Plinavon prendan ils commembers suenter lur stentas in refrestg ell ustria dil vitg. Dapi otg onns club da judo ei quella sentupada daventada usit. La sera finescha lu cun in pèr bunas partidas da «tschutti» sigl agen fussballin. Il Club da judo da Pigniu 6

7 1. Finamiras: sfraccar e zunghegiar dad Ursin Lutz 2. mieds: mogn e zaunga, 3. organs: glieud groppa, resp. commembers. 4. La suprastonza ei omnipotenta. Quei ein ils statuts dall UdSSR, l Uniun da Sfracca Slondas Ruschein. Statuts empau nunusitai, quei fa denton buc surstar fetg tier in uniun pli che mo in tec nunusitada. Minimum in promil Sco ils statuts muossan gia, ei l UdSSR in uniun che ha da far nuot cun activitads sco rimnar marcas, far cun legos ni passentar suentermiezdis cun beiber caffè e magliar petta. Ei va principalmein per sfraccar tut las pusseivlas caussas e da zunghegiar (per tut quels ch ein buc da Ruschein e contuorn: «zunghegiar» vul dir provocar ni ir silla gnarva ualti intensiv ad enzatgi) aschi bia glieud sco pusseivel. Quellas activitads vegnan secapescha adina exercitadas en sortida. Quei declara era il num dall uniun, «sfraccar» perquei ch ils commembers dall uniun semuossan savens sco glieud groppa, las «slondas» per honorar in commember d honur che seigi sespecialisaus sin slondas. Vitier vegn ch ins ha era encuretg in num che selai scursanir cun UdSSR. L uniun ei vegnida fundada la stad 2005 el Tessin da tschun confederai che fuorman aunc oz il coc dall uniun. Dapi lu han mintgamai duas radunonzas per onn liug, ina da Daniev ed ina dad Open Air Val Lumnezia. Suletta cundiziun ei ch ils commembers hagien minimum in promil, il rest decida la suprastonza. Aviartas e serradas vegnan las radunonzas mintgamai cun in tafer schnupf. Sper sfraccar e zunghegiar ha l uniun adina puspei creau novs t-shirts cun differents versets sco «Blau ei buca ina culur, blau ei in zuastand» ni «quei ch ei grop, stat grop!» per marcar presenza en sortida ed en auters loghens. Tec a tec han ins lu era creau in agen logo, ina pagina d internet secapescha schurmegiada cun in plaid-clav ed ils statuts suranumnai. Nadal e Pastgas ensemen Actualmein dumbra l UdSSR 12 commembers, ina commembra e quater commembers d honur. Ella suprastonza ston adina commembers grops esser. Igl ei era tuttina sche quels ein parentai in cun l auter. La suprastonza ei gie omnipotenta e decida aschia era tgi che vegn recepius ell uniun e tgi buc. Tenor reglament pren l UdSSR si neginas giuvnas, il president (cheu il «chef-sfraccader») ha denton confirmau sin damonda ch ei detti era tier els buc reglas senza excepziuns. La giuvna che hagi giu la cuida d entrar ell uniun cun tons giuvens hagi pia giu en quella situaziun Nadal e Pastgas ensemen. Ils commembers d honur san probablamein aunc nuot da lur cletg dad esser vegni nominai commembers d honur dall UdSSR. In mogn sco Ruschein ha aunc mai viu L emprema occurrenza pli gronda ei stada il camp da trenament per Silvester-Daniev 2006/2007. Per quei camp ha la suprastonza elavurau in plan da sortida naven dils 23 tochen ils 30 da december per sepreparar sillas grondas e bletschas festivitads sur Silvester e Daniev. Quellas san cuzzar tier la giuventetgna da Ruschein senza auter tochen lunsch viaden els 2 da schaner. Era quei che pertucca excursiuns ei l UdSSR buc da cumparegliar cun autras uniuns. Sco emprem viadi ha la suprastonza omnipotenta numnadamein planisau dad ir a Glion a pei ni cun LeoDirect (la posta da Ruschein-Glion) per cumprar leu in mogn sco Ruschein ha aunc mai viu per sfraccar aunc dapli. Buc concurrenza dall uniun da giuventetgna L UdSSR seigi buc da capir sco concurrenza dall uniun da giuventetgna da Ruschein, 7 plitost sco plattafuorma per saver organisar ulteriuras occurrenzas per la giuventetgna dil vitg. Ei seigi schon pusseivel che l UdSSR stetti empau en cuntradicziun all uniun da giuventetgna, quei seigi denton tuttavia buc el senn dall UdSSR. Ins vegli plitost cumpletar la purschida ed ei vegni era adina mirau da buc vegnir en conflicts da termins cull uniun da giuventetgna. Quei ha il «chef-sfraccader» medemamein confirmau sin damonda. Ei dat denton tuttina differents commembers dall uniun da giuventetgna da Ruschein che han empau difficultads cul secuntener dall UdSSR e teman era che quei seigi buc optimal per la reputaziun dalla giuventetgna da Ruschein anoviars e ch ei savessi dar duas gruppaziuns enteifer la giuventetgna dil vitg. Als commembers dall UdSSR para quei dad esser ualti tuttina pil mument, vesan els gie sesezs sco giuvn uniun spir ideas e finamiras che dueien era vegnir realisadas baul ni tard.

8 Uniuns da giuventetgna: dus purtrets Uniuns da giuventetgna ein enzatgei che tuts (en territori romontsch) enconuschan. Daco lu aunc presentar quellas? Perquei. Per veser co autras uniuns funcziuneschan, per forsa daventar pertscharts dallas qualitads dall atgna, per forsa veser las difficultads dalla giuventetgna en auters intschess. Alla tscherca d ina uniun da giuventetgna innovativa ed intacta ord igl intschess surmiran essan nus vegni fatgs attents sill uniun da giuventetgna da Casti. L autra uniun sesanfla en Val Lumnezia; buc el contuorn dil liug che tuts enconuschan neu digl open air, mobein forsa empau pli zuppau da tschella vart dalla val a Suraua. Dall Engiadina havein nus deplorablamein spitgau adumbatten sillas rispostas da differentas uniuns da giuventetgna. L uniun da giuventetgna da suraua da Silvana Derungs La vischnaunca da Suraua schai en Lumneziasut, amiez il tschancun denter Glion e Val S. Pieder, consista dallas tschun fracziuns Camuns, Surcasti, Tersnaus ed Uors-Peiden, ha rodund 300 habitonts e habitontas ed ei la davosa vischnaunca romontscha avon Val S. Pieder. Leu emprendan ils affons talian (e buca romontsch) naven dalla quarta classa. L uniun da giuventetgna da Suraua dumbra actualmein 21 commembras e 22 commembers ch ein part da quell uniun naven da lur 16avel onn tochen lur nozzas (ni lur giavisch d extrar). Limitas da vegliadetgna dat ei neginas, sco era (aunc) negins rituals tradiziunals sadistics per recepir ils novs commembers en l uniun. Tier las activitads s audan il far Sontgaclau, nua che quater gruppas semettan sin tura en las fracziuns, far cranz a caschun da nozzas ed organisar seras da divertiment sco sera familiara ed igl emprem d uost, quei en alternonza cun tschellas uniuns dil vitg. Dasperas cloman aunc autras lavurs occasiunalas, dis da sport ed in viadi pli liung. Igl unviern 2005 ei la giuventetgna semessa per l emprema gada dapi pliras generaziuns sin tribuna cun il toc da teater «Dr. Nock». Quei teater ei era staus tochen uss il punct culminont per Adrian Derungs en sia activitad sco president dall uniun da giuventetgna da Suraua. Adrian Derungs (19) habitescha a Camuns ed entscheiva igl uost la maturitad professiunala tier la Banca cantunala a Cuera. El ei dapi igl atun 2005 al tgamun dalla giuventetgna e fa quei uffeci cun grond engaschi e per tutta cuntentientscha dils commembers. Surpriu ha el il presidi cun l intenziun da motivar dapli commembers da separticipar activamein all uniun, e cun pintgas, mo pliras occurrenzas dar alla giuventetgna ina raschun da s entupar. S entupar vulan ins el futur era pli stedi cun autras uniuns da giuventetgna vischinontas, aschia per exempel cun Cumbel e Morissen, mo era cun separticipar empau pli savens a divers turniers da sport. Mo daco gest separticipar all uniun da giuventetgna, sch ins sevesa gie schiglioc tuttina? In motiv: Denter las fracziuns dat ei mo darar ina sentupada casuala denter auter era perquei che biars ein mo la fin d jamna a Suraua e l uniun ei aschia ina buna pusseivladad per s organisar e s entupar da temps en temps cun tuts. Plinavon sappi l uniun esser in bien sustegn surtut per ils giuvens gest ord scola e sin pass en la veta professiunala, cunquei ch els han cheutras ina caschun da s entupar cun tals en la medema situaziun. Tenor Adrian ei ina finamira oravontut dad integrar ils giuvens commembers aschi bein sco pusseivel en la giuventetgna ed era esser in bien exempel per ils affons da Suraua. Aschia ei gia dau en egl che sentupadas dalla giuventetgna ein praticamein senza fem buca da smarvigliar cun mo in, dus fimaders regulars. Giuvens e giuvnas passentan magari bugen las notgs dalla fin d jamna enzanua en sortida. La giuventetgna da Suraua cumbinescha quei gest cun in project numnaus «expansiun dil romontsch viers il sid», sco il president declara. Biaras giuvnas e giuvens prefereschien l atmosfera da Val S. Pieder a quella da Laax ni Glion ed aschia ei dapi varga in onn adina dapli giuventetgna romontscha (per gronda part da Suraua) dad entupar en sortida a Val S. Pieder. Tec a tec han perfin ils da Val remarcau che lur discoteca ei vegnida romontschada... Per la giuventetgna da Val seigi quei ina buna experientscha da sefatschentar cul romontsch, denton «quels da Val, quels ein schon endretg. Per part in tec specials, aber schon endretg», sco in commember dall uniun da giuventetgna da Suraua ha saviu relatar. In bus da notg dat ei deplorablamein buc en Lumnezia-sut. El mument vegnan ins bein da s organisar cun carrar en gruppas en sortida, mo tuttina fuss in bus da notg beinvegnius. Aschia ei quei punct era gia vegnius discutaus duront las radunonzas dall uniun e stat sin la «to-do-list» per igl onn 2007, silmeins per inaga sclarir las pusseivladads. Adrian Derungs, il president dall uniun da giuventetgna Suraua 8

9 L uniun da giuventetna da Casti dad Ursin Lutz Igl onn da fundaziun dall uniun da giuventetgna da Casti ei buca propi enconuschents, ils emprems statuts ch ein avon maun dateschan denton digl onn Sco las biaras uniuns da giuventetgna digl intschess catolic ha era quella da Casti survegniu igl emprem impuls dalla baselgia. All entschatta era l uniun da giuventetgna aunc ina cumpignia da mats; quella haveva per intent da tgirar la cumpignia denter la giuventetgna dil vitg e secapescha era da sustener ina buna educaziun religiusa, sociala e patriotica. Dapi igl onn 1970 vegnan era las giuvnas recepidas ell uniun da giuventetgna. Actualmein dumbra l uniun 25 commembers, 15 giuvens e 10 giuvnas. Tenor il president dall uniun, Giancarlo Lozza, ei gest quei pign diember la fermezia dall uniun. Aschia resta adina tut surveseivel, ei dat neginas gruppas, fracziuns ni partiziuns enteifer l uniun el center stat adina INA gronda gruppa. Las activitads dall uniun da giuventetgna Casti ein fetg diversas. In usit tradiziunal ei la fiasta d emprem d uost. La sonda avon vegn mintgamai iu ad uaul a rimnar lenna per preparar il chischner pil fiug. La sera digl emprem d uost dat ei ina fiasta per la populaziun digl entir vitg nua che la giuventetgna meina mintgamai l ustria. Mintga secund onn prepara l uniun in teater e dapi igl onn 1996 ha ei num a Casti ina gada per onn DISCO. Quella disco ei era igl eveniment il pli impurtont per l uniun. Entschiet ha tut en in rom surveseivel, cun in publicum da rodund 250 persunas. Biebein diesch onns pli tard stauscha quei diember encunter ils Aschia ei quei eveniment era la fontauna principala d entradas. Per l uniun sezza ei quell occurrenza secapescha fetg stentusa ed intensiva, e cun 25 commembers ei la capacitad da lavur al limit. Persuenter sa l uniun guder las ulteriuras occurrenzas, la grillada da stad, la scursalada d unviern, il di da GoKart, la tscheina da Nadal ed il punct culminont il viadi el jester da quater dis mintga secund onn. Era sche Casti ei situau al cunfin linguistic cul tudestg, dominescha il romontsch ell uniun aunc. L uniun ei bein ufficialmein romontscha, quella porta denton in tetel dubel (Uniun da giuventetna Casti; Jungmannschaft Tiefencastel) ed il lungatg tudestg survegn adina dapli peisa. Las radunonzas, l entira INA gronda gruppa a Hamburg administraziun e correspondenza vegnan denton aunc tenidas en romontsch. Il problem ei che Casti ha gia oz 60% habitonts da lieunga tudestga. Viu da quei pugn da vesta ei Giancarlo fetg cuntents culla situaziun actuala enteifer l uniun. Giancarlo Lozza (24) ei carschius si a Casti e studegia economia all universitad da Sogn Gagl. El ei dapi igl onn 2002 president dall uniun da giuventetgna ed ei fetg loschs d astgar menar ina tala uniun. Las occurrenzas vegnan frequentadas fetg bein e la collegialitad denter ils commembers ei grondiusa. Aschia fa ei era buca surstar che Giancarlo sesenta bein sco president dall uniun da giuventetgna da Casti. El organisescha bugen occurrenzas e gauda era la cumpetenza dad astgar coordinar il program annual e las singulas lavurs tenor las atgnas ideas. Tier il post da president s auda secapescha era ina buna purziun responsabladad ed aschia ei quella lavur meinsvart pretensiusa e stentusa. A caschun dad eveniments sco notgs libras ei il president adina quel che vegn sco emprem e va sco davos. Uonn ei denton il davos onn sco president per Giancarlo. Suenter tschun onns vul el dar vinavon quei post en mauns 9 pli giuvens. El conferma denton che tut en tut seigi quei stau in temps fetg interessant e ch el surprendessi aunc inagada quei post, sch el havessi da turnar a decider. Giancarlo Lozza, il president dall uniun da giuventetgna da Casti

10 Romania da Giuventetgna il num semida, l idea resta da Silvana Derungs Dapi ils 17 da fevrer 2007 dat ei ina nova uniun regiunala: la Surselva romontscha giuvna ei naschida ord la Romania da Giuventetgna (RdG). Las finamiras restan sco tier la RdG, numnadamein sustener giuventetgna romontscha sursilvana, seigi quei cun finanziar damondas da sustegn ni cun realisar agens projects. En suprastonza ein Thomas Candrian, Ivan Caderas (omisdus da Sagogn) e Simona Arpagaus (Laax). Ord la historia Entschiet ha la historia dalla RdG avon pressapauc 110 onns, numnadamein ils 15 da settember 1896 el hotel Tödi a Trun. Sut il presidi da Gion Cahannes da Dardin han ina roscha students ed in pugn plein teologs decidiu da fundar la Romania, in uniun che duei haver igl intent da cultivar il romontsch edescha la Romania l emprema Talina, quei sut la redacziun da P. Flurin Maissen. La Romania ha concediu 100 francs per sustener quella ediziun cun la remarca ch ils lecturs sappien ni stoppien era contribuir 40 centims ad onn per in abonnament ei la Romania vegnida partgida en duas uniuns: ina Romania gronda cun scolasts, academichers e la populaziun interessada sco commembers ed ina Romania pintga che consisteva oravontut da students serenumna la Romania pintga en Romania da Giuventetgna, quei sut il presidi da Leo Tuor. Dapi lu emprova la RdG da sustener la giuventetgna romontscha sursilvana cun organisar differentas projects en direcziun da musica, cant e dapi rodund 10 onns era el sectur da film romontsch. Engaschi per la giuventetgna L uniun ei stada a disposiziun naven dall entschatta per ils interess dalla giuventetgna romontscha. Mo cunquei che quella semida cul temps e cun ella las uniuns da giuventetgna ei era la RdG semidada. Haveva la RdG pli baul aunc commembers, eis ella daventada pli e pli in uniun che secumpona dalla suprastonza ed ha silmeins aunc ufficialmein sco commembras las uniuns da giuventetgna dalla Surselva. Mo atgnamein ei mo gest la suprastonza activa, magari aunc honorada cun la preschientscha da duas, treis autras persunas a caschun dallas radunonzas generalas. La RdG survegneva mintg onn ina summa fixa dalla Romania per finanziar ses sustegns e ses projects. Dapi la fusiun dalla Romania e la Renania alla Surselva Romontscha ha la RdG buca pli saviu quintar cun quella garanzia ed ei stada sfurzada da prender ina decisiun. Quei ei pia vegniu fatg il fevrer vargau cun activar la Surselva romontscha giuvna e sligiar la Romania da Giuventetgna. Lein sperar che era la Srg anfli sustegn egl interess da giuventetgna engaschada che drova agid per realisar ses projects. 10

11 Uniuns Uniuns Unir umans unics üna chosa fich difficila. Minchün craja da pudair fundar l uniun chi correspuonda a seis desideris. Quist es precis la problematica centrala. L egoist d hozindi nun accepta l opiniun da seis conumans. Tuot chi pretenda cha si uniun saja quella chi persvada il rest da l umanità, uschè cha l nomer da conflicts tanter glieud testarda dvainta da di in di plü grond. Cler chi dà fingià numerusas uniuns, ma eir quellas nu cuntegnan be persunalitats radschunaivlas. Dimena, perche insomma fundar ün uniun, scha la situaziun escalescha dafatta in quella? Perquai sarà l unica soluziun quella da s deliberar da tuot las uniuns e dad esser independent. Uschè po minchün ir si aigna via e be sperar chi nu detta conflicts interns. Ma sco chi s sa, acceptan pacs umans a sai svess ed ils problems as derasan eir in futur in maniera rapida sco üna pandemia. Madlaina, Mirjam, Romina Padruot Wege zum Glück Avant blers ons a Samigniun es gnüda fundada ün uniun d ün unicum chi vaiva nom Prof. Dr. lic. oec. nat. Padruot-Melcher-Zanetti. La problematica es quella chi manca la parantella o amis o inimis tja, ingüns amis, ingün uniun! I l dadaint da nos Padruot in milli tocs tuot d eira ruot damaja la plaja ha tut il suraman. El ha dat giò il sdun fat sü il scrauv es sigli aint illa chaista naira. El nun ha plü vis a crescher las fluors, vezzaiva però las carottas da suotinsü ed es i in convivanza (=uniun) culs verms! Anna, Flurina, Gianna, Sara L uniun dals Chillers La società d hozindi es adüna stressada, sto accumplir seis dovairs e sto verer chi guadagna avuonda raps. No lain dar ün impuls cunter quist svilup. No eschan da l avis cha minch uman haja merità üna vita plü cumadaivla. Quist es noss idea d üna uniun e no sperain da chattar blers commembers chi sun eir da noss opiniun. Nossas propostas per cumbatter ils problems da civilisaziun moderna: 1. Giodair la vita in cumünanza. 2. Nun as laschar stressar illa vita quotidiana. In cas da recascadas eschna pronts dad ans güdar tanter ils commembers in fuorma da discussiuns avertas. Ils umans sün quist muond sun fingià fich stressats. No nu lain cha quai resta uschè. Cun la fundaziun da noss uniun laina far alch cunter quist svilup. Quels chi han vöglia da gnir commembers sun cordialmaing bainvgnüts. Salüds, ils Chillers Dea, Flurin 11

12 Las punts politicas: La Lia Rumantscha è ina uniun e betg ina partida - ella na po betg far politica Roman Liesch Roman Liesch (20) vegn da Brinzauls. El ha fatg la matura e lavura per il mument. L onn proxim cumenza el in studi da matematica a l universitad da Turitg. El è en la suprastanza da la giuvna partida populara dal Grischun. Igl intent dalla Leia Rumantscha è an amprema lengia igl mantignamaint digl lungatg e dalla cultura rumantscha. Per cuntanscher chella fegnameira vign la LR finanztgeida cun contribuziuns federalas e cantunalas. «La LR è in institiuziun d util public. Ella è politicamaintg e confessiunalmaintg neutrala» Chellas construcziuns vaia catto sen la homepage dalla Leia. La dumonda è ossa, schi chel intent sò ansomma neir cuntanschia cun chellas directivas!?! Tgi la LR vess da restar politicamaintg neutrala, am para dètg logic. Finanztgeida digl mang public, ò la Leia Rumantscha l incumbensa dad adampleir igls giaveischs e las intenziuns digl mang public. Fixo èn chels interess e las fegnameiras gio er ainten la constituziun federala. Tge tgi vign decidia a Berna ed a Coira è en fatg e na so betg ple neir mido. La Leia ò da cumbatter cugls meds finanzials, tgi vignan mess a disposiziun da lò. Igl intent dalla Leia è formulo sen la homepage dalla Leia ed uscheia vess tot dad esser cler. Dantant dattigl an Svizra ena malsogna tgi sa derasa adegna pi extremamaintg. Chella malsogna sa nomna «lobbying». Mintgign tgi crei ozande dad esser en po pi impurtant, ò platgea ainten igls gremis politics pi impurtants igls sies lobbyists. Cun meds adegna pi impertinents ed extrems amprovan chels «malsangs» da derasar lour ideias ed intenziuns, dad influenzar igl pansar dalla gliout tgi decida p.ex. l otezza digl sustign finanzial per la LR. Ossa è la dumonda naturalmaintg noua tg igl cunfegn è. Ins pògl eir a far reclama pigls agens interess, schi pussebel perfign anc cun pitschens schintgetgs ni uscheia, e tuttegna anc valeir scu politicamaintg neutral? Dad ena vart ègl uscheia, tgi en instituziun tgi sa titulescha politicamaintg neutrala vess da piglier tot scu tgi vign, pertge mintga cass da lobbying è igl madem mument er en act politic cun la fegnameira dad influenzar meinis. Oramaias ansomma betg neutral. Da tschella vart stòia deir, tg ia sung losch da veiver an ena democrazeia noua tgi mintgign so e pò influenzar igl mintgade politic, e chegl betg angal cun esser lobbyist, mabagn er cun iniziativas e referendums. Uscheia ègl cleramaintg grev da restar politicamaintg inactiv, er sch igl è betg angal l inactivitad tgi monta neutralitad. Jon Pult Jon Pult (22) è student dad istorgia a l universitad da Turitg. El è cusseglier communal da la citad da Cuira per il PS ed ex-president dals Giuvens Socialists Grischun. El è oriund da Sent e stat a Turitg ed a Cuira. La Lia Rumantscha sto far politica. Far politica da linguas e politica culturala grischuna es üna da las lezchas principalas da la Lia. Ma la Lia nun es ün parti. Cun quai nu sto e nu po la far politica in tuot ils chomps chi nun han da chefar cul rumantsch. Scha la Lia nu fa però politica pel rumantsch, perd la üna part da sia radschun d exister l avegnir ed eir il destin dal rumantsch dependan massa ferm da las decisiuns politicas federalas, chantunalas ed eir cumünalas. La mancanza d ün ingaschamaint politic pel rumantsch davart da la Lia füss üna mancanza da respunsabiltà totala. L organisaziun da tet da tuot ils Rumantschs nu das-cha far politica da parti (eir na dal parti dal president!), ma ella sto far politica in nom da tuot ils Rumantschs e da lur lingua e cultura. 12 La Lia Rumantscha sto esser l organisaziun da lobbying rumantscha. Perquai cha la Lia es l uniun da tuot las organisaziuns rumantschas sto la eir surtour l uschedit «leadership» illas dumondas politicas chi pertoccan il rumantsch. Perquai sto la Lia sviluppar strategias politicas, persvader als politikers da quellas, e schi sto esser, eir far campagna in connex cun votaziuns popularas chi pertoccan il rumantsch. Actualischma es la discussiun davart la ledscha da linguas. Quia sto surtour la Lia Rumantscha la respunsabiltà principala organisond e coordinond la campagna, per cha tuots vuschan «schi». La Lia sto ir ill offensiva! I s tratta d üna dumonda existenziala per la trilinguità da nos chantun! A quist punct sto eir gnir dit, cha l organisaziun giuvna, la GiuRu, stess avair üna plü ferma conscienza politica illas dumandas pertoccond il rumantsch e las linguas in general. Eu spettess da la GiuRu, ch ella lantschess üna campagna giuvna. In quist connex stess la GiuRu tscherchar la collavuraziun cun ils partits giuvens e cun otras organisaziuns giuvnas. Il messagi principal d üna tala campagna giuvna stess esser: Ils giuvens grischuns e las giuvnas grischunas vivan e sviluppan inavant la trilinguità. Il motto: trilinguità es gailira gea a la ledscha da linguas!

13 ti vuls savair: 15 x Miss banana sa tut da Flurina Badel One year in Paris: Mélodie de Paris dad Anna Serarda Campell Da 1000 duonnas russas laschan 54 far abort annualmaing. Il plü pac radio taidlan in Europa ils Grecs. Il pajais chi prodüa il plü bler painch es l India, lura Pakistan e lura ils Stadis Units da l America. Bananas sun bunas cunter depressiuns e brüschella. La flur Nossaduonna vegn douvrada cunter depressiuns, diminuischa però l effet da la pirla antibaby. Daspö l on passà nun es Pluto plü ningün planet. Las giraffas sun bunas da s pulir las uraglias culla lengua. Cumportamaint homosexual es gnü observà pro passa 1500 bes-chas. Fin la fin dal 2005 sun 142 persunas rivadas sülla muntogna Annapurna (8091 m.s.m), 58 alpinistas ed alpinists sun percunter mortas cun ascender quist piz. es üna pagina extrem pratica per tscherchar pleds in tuot ils idioms rumantschs, rumantsch grischun e la traducziun da l inglais, dal frances, dal tudais-ch e dal talian. Dal rest es quista pagina gnüda fatta e finanziada da persunas privatas. La moderatura da la «Tagesschau» sün SF Katja Stauber (44) es 1.76m gronda e paisa 62 kils. E la Miss Svizra Christa Rigozzi (23) es 1.70m gronda e paisa 52 kils. A Cuoira esa da metter oura ils sachs da la merda in mardi e venderdi a las set a bunura, jo na la saira avant! I l füm d üna cigaretta sun fin a differentas substanzas. Tanter oter eir nicotin, metanol, benzol, acid ciamic e bleras otras substanzas donnaivlas. Ils 7 d avrigl es il di mundial per sandà, ils 12 d avrigl es in Russia il di dals cosmonauts, ils 23 d avrigl es il di da la biera tudais-cha (be in Germania ed a Mallorca), ed in Türchia es quel di il di naziunal dals uffants, e sün tuot il muond esa il di internaziunal dal cudesch. Il Girls Day (uriundamaing da la Germania) es ils 26 d avrigl, quel dess motivar a giuvnas per mansters tecnics o scientifics. Impè da Maizena as poja eir tour senf per far gnir plü spessa la fondue. «E schi nu funcziuna culla musica, tschercha süls mürs da la cità...» Eu n ha passantà quatter dis a Londra. Sun rivada e n ha respirà ajer cul gust da punk rock. Cler e net. Na l ajer, ma il soundtrack da la cità. E cull expiraziun n haja dat bada ch eu nu cugnuosch amo il soundtrack da Paris. Paris, quella bellischma cità ingio ch eu stun e sun. Che coincidenza cha ls duos pleds «stun e sun» han ün sen dubel, ün sen musical. Chi stuna minchatant es evidaint eir punk rock po stunar, mincha melodia, mincha musica. Da temp in temp forsa eir aposta, per dar üna sdarlossada, per svegliar l attenziun, per sdasdar. Ma il sun, il sun da Paris, co clingia l? Punk rock es exclus. Tango nun esa neir na, eir scha blers films sugereschan quai. Il valzer es reservà per Vienna. Rock n Roll tocca ad ün temp passà, na plü actual. La musica classica, ch eu n ha lönch considerà sco soundtrack pussibel, dess a la percepziun da la cità ün touch massa dramatic, massa dramatisà. La musica electronica chi rapreschainta la majorità dals clings e suns in bod mincha boîte da Paris, tuna be bain tanter quatter paraids e davo cha l sulai es tramuntà. E schi s cumainza a crajer chi s haja chattà la soluziun illa chanson, as stoja scuvrir ün pêr respiraziuns plü tard chi s ha fingià darcheu as laschà surmanar dal clischè. Per salsa ed insomma musica latina es Paris massa staif, massa distingué massa Paris. Free Jazz sunà d ün saxofon solo tocca pro meis favorits pel mumaint. Ma forsa sbaglia in quist cas la melodia da la cità cun meis stil da viver. Pop es massa dutsch ed a la fin finala massa banal. Tuot ils bâtiments fessan schnöss d üna musikina uschè simpla, bainschi bella, ma inoffensiva. Blues es massa nostalgic, Jazz plutôt pussibel. Kind of Blue da Miles Davis nu clingia mal. Ma, al listess mumaint massa pac bourgeois. Dimena eir sbüttà. Nu doda plü bain? Tira massa svelt il flà? O n haja propcha da cuntinuar culla glista da stils da musica per relativar adüna darcheu e dir a la fin: na, neir na! Glamrock, brit pop, o plütost french pop, new wave, hip hop, ska, house o country na, neir na. E Wing (tunes. com) sgürischem na. Ma forsa ha Paris intant fingià tschüf ün beat tuottafat persunal per mai. Üna melodia chi unischa üna schelta da tuns, suns, melodias, chanzuns, caneras e rumuors chi s transfuorman permanaintamaing. La canera da la metro insembel cullas uondas da la Seine, suivi dal saxofon e da l eco dals pass da s- charpas cun tach... Ma mélodie de Paris... fingià massa variada, cun milli fatschas, cun respiraziuns profuondas e suspürs, minchatant étouffante e minchatant uschè ligera sco ün soffelin. In mincha via otra na adüna définissable, ma adüna preschainta. Anna Serarda Campell (23) stübgia a Paris e scriva mincha mais da sias aventüras illa metropola. 13

14 La soap: la scoula da Tinetta Rauch Ün di n haja lura dudi. Alch plü terribel nu vessa pudü dudir in quel mumaint. Eu d eira güst tuornada da scoulina. Mamma d eira al telefon e dschaiva da quai disperada mez cridond: «Ma che voust cha la kindla fetscha amo ün on a scoulina, ella sa uossa fingià tuot quai chi s imprenda in prüma classa.» Eu nu pudaiva crajer chi d eira la discussiun da mai. Eu vaiva fingià la barsocca, l etui, eu vaiva fingià impromiss ad Angelina dad ir in banc cun ella... Amo mai nu m vaiva sentida uschè disperada sco quella jada. Eu n ha rivi la porta da stüva uschea e n ha sbragi tuot disperadamaing: «Maaaamma, eu vegn a scoula, nun, nun, maaaaaaaaaaaaaaamma!» Eu tilla straiva pel pullover e cridaiva e scuffuondaiva. Mamma ha dit cun üna vusch chi nu pudaiva plü tgnair inavo la crida:«no stübgiaran üna soluziun!» ed ha lura tachà sü il telefon. I m d eira impussibel dad incleger perche ch eu nu vess dad ir a scoula. Quista jada nu d eira neir mia stüva da poppas buna da m distrar. La saira am ha tut bap sün bratsch. Mia sourina d eira pro nona. Mamma zerclaiva aint il test cun aint mailinterr in painch e mettaiva aint adün inavant tschiguolla. Eu nu savaiva sch ella cridess pervi da la tschiguolla o pervi da quai ch ella cridaiva l ultim temp adün inavant. Bap nu cridaiva mai. El d eira adüna quiet, i m faiva però temma perquai ch el nu m respuondaiva. «Bap, nun ch eu poss ir a scoula davo las vacanzas grondas?» Ingüna resposta. El ha be trat aint ferm il flà, e mamma til ha dat via ün ögliada trista. «Baaaap, eu vegn a scoula!» «Figlia», ha l lura cumanzà e güst fat darcheu üna lunga posa e lura darcheu cumanzà da prüma: «Figlia, forsa cha la scoula quia in cumün nun es il dret per tai, forsa chi dà inclur oter eir üna fich flotta scoula cun blera glieud uschea sco tü...» Glieud sco tü, quai nun inclegiava... «Ma eu n ha fingià impromiss ad Angelina...» «In ün otra scoula chattast sgüra eir üna flotta amia» «Perche, perche, perche...», eu n ha cumanzà a sbragir tuot quai chi giaiva. Eu daiva sfrachs culs peis giò sül fuond e n ha büttà tuot las tazzas sün maisa giò per terra. Bap e mamma staivan sco paralisats e m laschaivan far la bes-cha quant ch eu laiva. Fin ch eu nu savaiva plü che far e m n ha laschada crodar giò sül fuond e n ha cumanzà a scuffuonder. Bap am ha lura tut sün bratsch ed eu sun statta là quietina, n ha miss il polsch aint in bocca sco cha Mirella faiva davo avair bavü tetta. Eu n ha improvà da far verer ch eu füss Mirella. Ün poppin. Eu d eira stangla. Quist es la quarta part da la soap da Tinetta Rauch (22), e l istorgia cuntinua illas prosmas PUNTS. che vita da chans: Il «Doppelpack» da Fadrina Hofmann I dà pêrins chi sun talmaing inamurats chi cumparan be amo sco uschedit «Doppelpack». Quels inamurats sun uschè occupats cun lur sentimaint da «nus» ch els nu s san gnanca plü d imaginar co chi d es d avair üna vita individuala. Quai es bel per els e nerva al rest. Cur cha l amur svanischa lura dandettamaing sun tuot ils amis davent e l ex-inamurà/ada as dumonda perche, e s sainta fregà/ada. Eu appartegn plüchöntsch pro quella spezcha d inamurada chi disch: «Cun meis char esa fich bel, ma ün zich spazi douvra minchün per sai». Fin uossa ha quai funcziunà tip top. Fin uossa, fin ch eu n ha survgni a Birba. Meis chanin appartegna nempe plütöst pro l otra spezcha d inamurats e quai pro l exemplar extrem. Birba es dvantada mia pitschna sumbriva. Ella m accumpogna dapertuot e nu m lascha our d ögl. Ella vain cun mai a kino, a baiver üna, in cumün e dafatta a conferenzas da pressa. Ella m inspirescha cun scriver meis artichels ed occupa üna gronda part da meis temp liber. La tualetta n haja stuvü declerar d incuort sco zona privata impussibel d avair meis pos sül trun sch ün pêr ögls prus cuccan da suotinsü. Cur ch üna amia ha manià d incuort: «A vo daja eir be amo sco Doppelpack», n haja stuvü constatar ch eu sun dvantada sainza lair «üna da quellas». Che impissamaint sgrischus! Perquai cumainza planet a laschar a Birba pro mia famiglia, Fadrina e Birba ün uniun exemplarica a tilla rantar davant butia ed ad ir be suletta in schler per üna butiglia vin (oh hai, quai es üna prestaziun). I funcziuna cun ün pitschen tric: Mai verer aint ils ögls prus d üna mattina inamurada! Fadrina Hofmann (24) es schurnalista e viva a Scuol. 14

15 Mes tracks: Curdin nicolay 1) Bob Dylan : Spirit on the water Pel mumaint taidl eau la nouva cd da Bob Dylan Modern Times. Impustüt la chanzun Spirit on the water. Eau sursigl adüna la prüma chanzun. 2) Eduardo Bennato : Un giorno credi La casetta da Bennato da mia sour granda d he eau taidlo e taidlo aint in nos Renaut sü e giò per l Engiadina. Uossa èla ruotta. 4) Paulin Nuotclà : Bunura El ho scrit bgeras bunas chanzuns ed üna da quellas es Bunura 5) Züri West : Aui sii scho lang verschwunde Eau d he gugent las istorgias cha Kuno Lauener quinta. Ed uossa ch eau gir suvenz per Berna intuorn, survegnan il Kreissaal, Pyri e la Perry bar tuot in d üna vouta üna fatscha. 3) Element of Crime: Und du wartest Quels faun simplamaing coola musica, eau als d he vis d incuort a Friburg. Üna greivezza da la vita chi permetta da surrier. (Impustüt la trumbetta). Curdin Nicolay (26) è «Farbgestalter», viva a Berna, Bever e Turich. El fa musica. Sulet e cun Rico Puorger. Fumetto da Jon Bischoff 15

16 GiuRu preschenta: la seria da Sara Hermann Mintga cuc sa tge che la GiuRu è, ma nagin che sa propi tgi che la Giuru è. Forsa che tes vischin, tia coiffeusa, tes schef u tia affera pudessan er esser GiuRu? Nagin che sa vairamain. 148 fatschas, ina pli bella che l autra, ma nagin sa che questas persunas èn propi commembras da la GiuRu. Scandal! En questa seria mensila vegn preschentà in commember suenter l autra commembra. Aluis...Ursina...Domenic...Flurin...Romana...Rico... prenum, num: Aluis Candinas lieu: Rabius annada: 1985 quai hai jau gugent: ina sfegliada cun crema quai hai jau betg gugent: computers a_candinas@gmx.ch ********************************************** prenum, num: Ursina Nicolay lieu: San Galla annada: 1982 quai hai jau gugent: vin e cigarettas quai hai jau betg gugent: chamulaunas, ris en latg, controlladers da tren yalocin21@yahoo.de ********************************************** prenum, num: Domenic Mayer lieu: Strada in Engiadina annada: 1988 quai hai jau gugent: pestgar, sortida e far giu cun collegs quai hai jau betg gugent: memia bler stress domenic_mayer@hotmail.com ********************************************** prenum, num: Flurin Bundi lieu: Sagogn / Cuira annada: 1986 quai hai jau gugent: sosa da curry tar ina buna grillada cun mes amis quai hai jau betg gugent: reclama tranter in bun film flurinb@bluewin.ch ********************************************** prenum, num: Romana Klaiss lieu: Vella annada: 1984 quai hai jau gugent: pudair rir da tut cor quai hai jau betg gugent: il cuntrari ********************************************** prenum, num: Rico Valär lieu: Turitg / Zuoz annada: 1981 quai hai jau gugent: surrirs, inscunters, opera, cudeschs, paris, cullas da lindor alvas, fotografar, famiglia, musica classica, na-conformissem, Stefan Zweig, rumantsch, respect, linguas, teater, viadis, libertad, trens, egls, Engiadina quai hai jau betg gugent: trams plains, ipocrisia, quints, fans, nauschadad, fast-food, fim, massas, chauns, militar, tunnels, dogmas, tschaiera, violenza, spetgar, tussis, naiv artificiala, duo-pack, engelers ricova@gmail.com 16

17 In unitad (en memoria dalla Doors Celebration Party e dalla gruppa The Doors Experience) da Carin Caduff Nua tia egliada era adina ruaussa Mimicas cauldas, cordialas e rientas In sesentir da casa Ina muntanera d jasters, mo tuttina in unitad Partend quei plascher anticipau Discuors plein profunditad poetica Olmas parentas s uneschan Spitgond, malpazient avon quei esch Igl esch che sparta dil palast musical Eivradad da dultscha legria sederasa ell aria Las portas sesarvan Il mument schi desiderau ei arrivaus Entrond, en quella stanza zugliada en misteris En quella tiara nova & nunenconuschenta Pass bufatgs & plein marveglias Che meinan tei en quella bellezia localitad Glisch mistica & carsinonta Las cazzolas fleivlentan Tensiun barschonta percuora nos corps In umbriva cumpara silla tribuna Cudezza nus gioga cun nus Finalmein! In migeivel resun enconuschent Il fiug ei s inflammaus In intensitad & energia magica ha priu en possess nus Fermond ils egls fisics Alas invisiblas creschan libertad interna La relaziun terrestra piarda sia valur Nus, en nies mund communabel Nus, ils pelegrins en quella dinastia fascinonta Jason Boiler, il cantadur da The Doors Experience s annunziar ussa per la sessiun dals giuvenils GR.07 Sessiun dals giuvenils GR.07 sut quest num organiseschan las quatter partidas giuvnas da noss chantun (giuvna PCD, giuvens liberals, giuvens socialists e giuvna PPS) cuminaivlamain l emprima Sessiun chantunala dals giuvenils. Questa ha lieu ils 12 e 13 da matg 2007 en l edifizi dal Cussegl grond a Cuira. A la conferenza da medias dal 1. da favrer 2007 han las quatter partidas giuvnas da noss chantun preschentà il concept per l emprima Sessiun chantunala dals giuvenils. Questa ha lieu ils 12 e 13 da matg 2007 en l edifizi dal Cussegl grond a Cuira. Tut ils giuvenils da 16 fin 25 onns, domiciliads en il chantun Grischun, pon sa participar a la sessiun. Il dumber dals participants è limità a 120 persunas. La Sessiun chantunala dals giuvenils vul porscher a las giuvnas ed als giuvens dal Grischun ina plattafurma per discussiuns e debattas politicas davart temas che stattan en connex cun noss chantun. Ella duai dar invista als giuvenils en la politica e motivar els da sa participar activamain a la vita sociala. La Sessiun dals giuvenils GR.07 cumenza sonda a bun ura cun in pled da la presidenta dal Cussegl grond. Alura vegnan ils participants dividids en gruppas. Ils experts introduceschan ils participants en il tema. Silsuenter discuteschan las gruppas il tema ed elavuran ina petiziun. Ils suandants temas stattan a disposiziun: il Grischun sco lieu da furmaziun, integraziun, giuvenils en la politica, il Grischun sco lieu da lavur, service public, il Grischun sco lieu turistic e l ambient. Ils giuvenils pon inditgar il tema preferì en lur annunzia. La saira vegn organisada ina festa. Dumengia a bun ura pon las participantas ed ils participants prender invista da las petiziuns da las ulteriuras gruppas e far eventualas propostas da modificaziun. Pli tard il suentermezdi cumenza ina discussiun en il plenum che vegn moderada da Patrick Rohr da la Televisiun svizra. Suenter la surdada da las petiziuns approvadas al president da la regenza ha lieu in apero cun ils giasts preschents. Ils giuvenils vegnan a pernottar en la caserna da Cuira. Las spaisas e las bavrondas vegnan messas a disposiziun. Las participantas ed ils participants na duain avair nagins custs considerabels quests dus dis. Il comité d organisaziun per la Sessiun dals giuvenils GR.07 sa cumpona d in represchentant da mintga giuvna partida, numnadamain da Simon Berther per ils giuvens liberals, Martin Candinas per la giuvna PCD, Urs Domenig per la giuvna PPS ed Yvonne Michel per ils giuvens socialists. Rico Monsch, Past President dal Lions Club Cuira, sustegna il comité d organisaziun sco cussegliader. En sasez è il termin d annunzia ì a fin ils 18 da mars. Tut segund èsi però anc pussaivel da s annunziar pir uss per la Sessiun da giuvenils GR.07. T informescha e t annunzia sut www. jugendsession-gr.ch. 17

18 Urs Paul encunter la romontschia da Martin Blumenthal Jeu hai tertgau da fundar in uniun per intermediar denter la Surselva Romontscha ed Urs Paul Engeler. Quei schurnalist dalla Weltwoche che ha dedicau dus artechels als Romontschs. Jeu hai legiu siu emprem text il settember digl onn vargau. Mia reacziun ei mo stada in pitgiv surrir, schegie che Engeler ha era raschun en certs puncts. Jeu havess bunamein emblidau il text sche la Surselva Romontscha havess buca purtau plogn encunter il redactur Urs Paul Engeler ed aschia puspei tratg il tema ellas medias. Highlife ella regiun morta (emprem artechel) Engeler ha retschercau mal pigl emprem artechel sco era pil secund. Denton vi jeu era menziunar ils puncts nua che Engeler ha tuttavia raschun. Igl ei ridicul, sch il parlament svizzer vul absolver sia sessiun en territori romontsch e setschenta lu a Flem, in vitg cun aunc 7% populaziun romontscha. Daco ei nies parlament buc ius a Vrin? In vitg cun varga 90% populaziun romontscha, denton senza in hotel sco il «Parkhotel Waldhaus» a Flem. Era il fatg ch il romontsch ei statisticamein buca pli il quart lungatg svizzer, mobein il dieschavel, ha Engeler menziunau, denton duess quei esser clar a mintga Romontsch che nus essan ina pintga minoritad en Svizra. El menziunescha era ch in Jauer rispundi ad ina damonda romontscha d in Sursilvan per tudestg. Jeu hai era fatg mez quell experientschaa cun divers Jauers e Ladins che lavuran buca gest tier ina instituziun romontscha. Avunda laud, jeu vi aunc splimar siu text in tec pli criticamein: Engeler pretenda ch ils Romontschs survegnien 4.6 milliuns dalla Confederaziun. Quei constat insumma buca. Il quen annual dil stadi 2005 muossa bein expensas da 4.56 milliuns per la promoziun da lungatg e cultura el Grischun, denton era 2.28 milliuns per la promoziun da lungatg e cultura en favur dil Tessin. Forsa eisi ina casualitad ch il Grischun retscheiva exact il dubel dil Tessin, denton jeu dubetel quei e crei plitost ch il Grischun survegni 2.28 milliuns per promover il talian e 2.28 per promover il romontsch. Sche Engeler havess visitau la casa dad RTR, havess el percurschiu che quella sesanfla buca el marcau vegl da Cuera, perquei che lez finescha tier la rundella che vegn numnada Porta Sut. Engeler scriva dil Crap Sogn Gion sur Flem, manegia denton plitost il Crap da Flem. Quei muossa era puspei con munglusas che sia retschercas ein stadas. La SDA translatescha neginas novitads per romontsch, Engeler pretenda bein. Era temas che han da far insumma nuot culs Romontschs, ni silpli indirect, vegnan tematisai en quei artechel, sco per exempel la Porta Alpina ed ils pagaments directs als purs. Mintga schurnalist vul che schi biars sco pusseivel legien siu text, aschia era Urs Paul Engeler. Per provocar empau ha el scret ina introducziun che croda en egl cun biars adjectivs, denter auter era «räuberisch» ed «erpresserisch». La reacziun L emprema persuna che ha scret in commentari el forum silla pagina d internet dalla Weltwoche era «Resistenza». In giuven Romontsch che pren las medemas armas sco Engeler per far vendetga e numna quel in smalediu manzaser. Suenter rispundan differentas persunas, buc da viarva romontscha, cun ludar il bi lungatg romontsch. Ina interessanta persuna che s annunzia pér suenter il secund text ei «Farraday» da Glion. El(la) vul schar ora sias agressiuns encunter il romontsch e fa quei cun titular Cabalzar, Vincenz e co. cun plaids meins bials. Pli tard ei «Farraday» lu puspei s annunziaus/ada per pretender ch el(la) vesi aunc potenzial da spargnar tier las PUNTS. Quei ha lu gest dau a mi il stausch da scriver quest text per las PUNTS. Era ils Romontschuns, sut il tgamun dalla Surselva Romontscha, han reagiu cun purtar plogn encunter Urs Paul Engeler. Buca la pli nobla varianta per sligiar ina dispeta, denton ina pusseivla. Il pir ei ch ils Romontschuns han giu l illusiun che Engeler seperstgisi persunalmein a Glion per quei ch el ha scret. Lur plogn era da gliez temps gia tier la dertgira a Berna. 18 Urs Paul Engeler va Glion retour (secund artechel) Schegie che Engeler ha gia astgau retscheiver avon in pèr smanatschas, eis el serendius cun la Retica a Glion. Alla discussiun da podi eis el buc seperstgisaus, denton discutau cun Vincent Augustin e Martin Cabalzar. Jeu persunalmein hai era buc spitgau ch el seperstgisi. Sch ina partida preferescha dad ir avon dertgira, lu sa la discussiun vegnir fatga leu e buc ella publicitad. Era el secund artechel inventa Engeler in pèr caussas per ch il text resti aunc in tec interessants per il lectur tudestg sco per exempel che La Quotidiana seigi subvenziunada e che tut ils texts dalla Diana seigien screts en Rumantsch Grischun. Ed ussa? Nuot Tgei ei semidau cun quels text? Insumma nuot. Ils Romontschs survegnan aunc adina tuttina bia daners da Berna e tut va vinavon sco tochen dacheu. Igl ei denton flot che nus havein saviu tschintschar e scriver davart quei tema e che schizun la Dertgira nauscha da Mustér ha anflau ella persuna da Urs Paul Engeler in delinquent per metter sin pantun da gliendisdis tscheiver. Jeu hai aunc inagada schau ir atras il tgau l idea da fundar in uniun. Per l ina ei quei vargau, ils artechels memia vegls, la caussa emblidada, e per l autra porta ei era nuot. Aschia hai jeu decidiu da schar quei cun bien. P.S.: Il Radio Romontsch ha aunc adina neginas emissiuns per affons e per la giuventetgna, e la pagina battaporta.ch vegn aunc adina renviada sin rtr.ch.

19 container 154 Engiavinera 154 impressum PREMIERA ALS DIS DA LITTERATURA 2007 Sonda, ils 10 da november, la saira da las fin la damaun a las po in e scadin preleger ses texts rumantschs en il rom da l emprima «Notg litterara». Has fatg ina poesia, translatà in text, scrit ina istorgia u vuls preleger ina passascha ord tes cudesch preferì? Lura t annunzia fin la fin da matg tar il Radio Rumantsch. Per l emprima giada en l istorgia dals Dis da litteratura vegn organisada ina notg litterara senza cunfins. Il program preveda ultra da las prelecziuns era intermezzis musicals, in istorgia erotica da cuntinuaziun e surpraisas culinaricas. Quest program nocturn vegn emess directamain dal Radio Rumantsch. Igl è pussaivel d inoltrar plirs texts rumantschs Ils texts na d astgan betg esser pli lungs che 10 minutas Igl è pussaivel da preleger: agens texts, texts translatads u passaschas ord cudeschs Las prelecziuns han lieu tranter las e las Ils organisaturs fixeschan l ura da prelecziun I l s t e x t s s t o n v e g n i r i n o l t - r a d s f i n i l s 3 1 d a m a t g a l Radio Rumantsch, Via da Masans 2, p.m. Erwin Ardüser, 7002 Cuira POSTA LATINA Insatgi s ha da gronda fadia dà translatar sia novitad en latin per trametter questa a PUNTS: «Liber est quisque ex parvuli dialecti sui ex capulo pendere!» Era suenter retschertgas intensivas n è la redacziun dentant betg vegnida da decodar il messadi. Tgi po gidar? Engiavinera 152 Caribica è il pled da soluziun da l engiavinera 152 dal favrer. Clau Dermont è il victur da quella. Cordiala gratulaziun a Rueun. Engiavinera - premis Per far dapli gust da prender grondas stentas sin sasez e sa strapatschar mintga mais da schliar las engiavineras, dattan las PUNTS ina survesta dals premis ch ins po guadagnar. DCs: «Il nov disc cumpact cun si musica rumantscha ACCENT»; «Revoluziun - Grooves Rumantschs»; Lain Fabular «Ils Beatles per Rumantsch»; Liricas Analas «Analogia» ed «Analfabad»; Mario Pacchioli «Vias»; Prefix «Sgratta m»; Marie Louise Werth «Pur amur» cudeschs: «Il stgazi da la Delfina»; Derib «Jo», «Theorieprüfung»; «Istorgia grischuna»; or da la collecziun «Egls averts»: Mammals, Futur, Amfibis, Utschels, Flurs; PUNTS, ediziun 130 «intim» cun autograms da Sens Unik engiavinera (guarda frontispizi) Legia las duas colonnas grassas da surengiu e ti retschaivas il pled da soluziun. Trametta quel per plaschair cun indicaziun da tia adressa a: Silvana Derungs, Hauptstrasse 117, 1715 Alterswil; scriva in sms a u in a: silvana.derungs@punts.ch. 1. Attribut (da vegliadetgna) da la glieud en biaras uniuns preschentadas en questas PUNTS 2. Grond animal dal temp glazial che na cumpara betg en questas PUNTS 3. Festa che las giuvnas che vegnan recepidas en l UdSSR han ensemen cun Nadal 4. Prenum dubel da l autur sursilvan che ha scrit in cudesch da chatscha e ch era ina giada en il presidi da la RdG 5. Prenum dal pli impurtant giuven en la Rumantschia Chauredactur: Ursin Lutz, Bankstrasse 6, 7000 Cuira, ursin.lutz@punts.ch, Redacziun: Flurina Badel, Rabengasse 17, 7000 Cuira, flurina.badel@punts.ch Martin Cantieni, Encarden 18, 7152 Sagogn, martin@cantieni.info Silvana Derungs, Hauptstr. 117, 1715 Alterswil, silvana.derungs@punts.ch Chatrina Josty, Majorangasse 6, 7000 Cuira, chatrina.josty@punts.ch Collavuratur/as en quest numer: Sara Hermann, Martin Blumenthal, Fadrina Hofmann, Tinetta Rauch, Jon Pult, Roman Liesch, Flurina Cajochen, Anna Serarda Campell, Carin Caduff, Madlaina, Mirjam, Romina, Dea, Flurin, Anna, Flurina, Gianna, Sara Layout nr. 154: Annatina Dermont, Hauptstr. 37, 6015 Reussbühl annatina.dermont@punts.ch Secretariat: PUNTS, Aita Pult, 7551 Ftan, punts@rumantsch.ch, Editura: GiuRu, Chascha postala 312, 7002 Cuira, giuru@giuru.ch Abunament: 45 francs per onn, Raiffeisen Surselva, clearing 81073, conto , Stampa: Spescha e Grünenfelder, 7130 Glion Internet: Avis: Las opiniuns dals auturs en quest numer na ston betg correspunder a l opiniun da la redacziun da PUNTS. PUNTS è commembra da l Associaziun da la Pressa Svizra dals Giuvens. In bun uman «Uss sun jau fortunà: Grazia a l abunament da PUNTS sun era jau finalmain in bun uman.» Uschia ha Flurin Caviezel da Cuira formulà ses plaschair dad esser nov abunnent da PUNTS - nossas gratulaziuns! 6. Bella vallada che cumpara pliras giadas en questas PUNTS e ch è il fanadur in lieu da «pelegrinadi» per fans da musica 7. Num da l anteriura emissiun per la giuventetgna sin il RR 19

20 AZB 7130 Glion Punts 155 cumpara L entschatta Matg 07 cun il puntissimo «Emprima amur» ord la quotidiana 20