Nuummi Timersoqatigiiffiit allattorsimaffiat
Timersornissamik aalanissamillu tamanut neqerooruteqartoqarnissaa Kommuneqarfik Sermersuumit pingaartipparput tamassuma peqqinnartuunera, nuannaartitsisarnera inuunermillu pitsaasumik sunniuteqartarnera pissutigalugit. Timersoqatigiiffiit ingerlataat peqqissuunissamik sunngiffimmilu sammisaqarnissamik pilerilersitsisarput. Ataasiakkaarluni timersornermiit iligiikkaarluni timersornerit matumani takusinnaavatit. Timersuut suna soqutiginerlugu inummiit inummut assigiinngitsuuvoq, ilaat kisimiillutik timersorusuttarput ilaasalu ataatsimuussuseq iligiikkaarlunilu timersorneq pingaaartitaralugu. Timersorneq sunngiffimmilu sammisaqarneq peqqinnartuupput, inuiaqatigiinnilu pingaaruteqartumik inissisimallutik. Kajumissutsiminnik sungiusaasut, aqutsisut allallu timersornerup siluarsuaani akuulluinnartut timersoqatigiiffiit ulluinnarni ingerlanerannut timersortartunullu pingaaruteqarput, taakku meeqqat inuusuttullu soorunalumi inersimasut utoqqaallu ineriartornerannut pingaaruteqartumik inissisimapput, annertuumillu sunniuteqarlutik. Timersorneq piumasaqaateqarfiusinnaavoq aammali nuannaarnermik annertuumik tunisiviusarluni. Sungiusarluarneq, ukiorlu tamaat sungiusarnissamut periarfissaqarneq angusaqarluarnissamut aallaaviusarpoq. Allattorsimaffimmi uani Nuuk pineqarpoq, 2014/15-imullu atuulluni. Kommuneqarfik Sermersuumi illoqarfikkaartumik takussutissiaq piffissami qanittumi takkutissaaq. Inussiarnersumik inuulluaqqusilluta Tamanut Kiffartuussivik
Kommuneqarfik Sermersuumi amerlasuunik assigiinngiaartunillu peqatigiiffeqarpugut. Peqatigiiffilerinerup annertunersaa namminneq kajumissutsiminnik sulilluartut suliaraat. Peqatigiiffippassuaqarnerput innuttaasut inuiaqatigiinni akuunissamut piumassuseqarnerannut takussutissaavoq. Akuuneq tamanna tanngassimaarutigalugulu illersussavarput, aammalu tapersersorlugu. Eqeersimaarluni inooriaaseqarneq peqqinnartumik inuuneqarnerup ilagaa pingaaruteqartoq. Kommunitsinni peqatigiiffiit assigiinngitsorpassuit sunngiffimmi sammisassanik amerlasuunik toqqagassaqartitsipput paraglidernermiit arpalluni sumiissusersiornermut aammalu nalunnermiit karaternermut. Assigiinngitsunik tamanik soqutigisalinnut ukioqatigiiaanullu tamanut periarfissiissutit tamarmik pissarsiarineqarsinnaapput. Allattorsimaffimmi uani Nuummi timersornikkut peqatigiiffippassuit periarfissallu naatsumik ilisaritinneqarput. Pissarsivigilluarisiuk! Inussiarnersumik inuulluaqqusillunga Borgmesteri Asii Chemnitz Narup
Nalunneq Nalunnermi periarfissat: Hold 1: Raaja - Meeraaqqat nalunnerat 2-6 qaamm.- 7-12 qaamm. - 12-24 qaamm. Hold 2: Puisi 2-4 ukiullit angajoqqaatik ilagalugit nalunnguarnerat Hold 3: Ammassak 4-6 ukiullit angajoqqaatik ilagalugit nalunnguarnerat Hold 4: Aaveq - 6-8 ukiullit. Hold 5: Niisa Hold 12: Nataarnaq Hold 6: Aarluk Hold 7: Tunnulik - ingerlaqqittut Hold 8: Nanok - piginnaasallit Hold 9: Inersimasut ilitsersuisoqarlutik Hold 10: Hold tamatigoortoq - imermi aerobic / eqaarsaaneq Hold 10: Hold tamatigoortoq inersimasut ilitsersuisoqaratik nalunnerat Hold 11: Inersimasut imermiinnissamik sungiusartut Hold 13: Qajartorluni polo sungiussisimasut Hold 14: Qajartorluni polo aallarterlaat Hold 15: Imermi polo Hold 16: Qajartorluni polo immikkut piginnaasallit Hold 17: Soraarninngornikut Malugiuk holdini ukioqassutsit killilerneqanngimmata, meeraaqqat nalunnerat kisiat pinnagu, tassa meeqqat ataasiakkaat piginnaasaat apeqqutaatinneqarmat. Ukioqassutsit killingi missingersuutaapput. Holdini tamatigoortuni nalunneq, imermi aerobic/ eqaarsaaneq sapaatip akunneranut ataasiarluni arlaleriarluniluunniit ataatsimoortinneqarsinnaapput. Nuummi Naluttartut Klubbiat info@nalu.gl ttp://www.nalu.gl/
Tilluunneq Tilluuttartutut pikkorissuuniaraanni ukiorpassuit sungiusartariaqarpoq. Sungiusarnermut ilaatigut ilaapput arpanneq, pississaarneq, qisuariartarnermik sungiusarneq, oqimaaqatigiissaarneq, tilluuttuusaarneq sungiusaqarteqarlunilu tilluunneq. Tilluuttuusaarnerup sungiusaqateqarlunilu tilluunerup saniatigut atortut allat assigiinngitsut aamma atorneqartarput, soorlu puut sioqqanik imallit, speedbags aamma doulbe end bag. Tilluulluni unamminissaq qaammammik ataatsimik sioqqullugu nalinginnaasumik sakkortuumik ullormut akunnerni 4 8-ni sungiusartoqartarpoq, qasujaallinissaq oqinnerulernissarlu anguniarlugit, tilluuttartorpassuit tilluuttartutut oqimaassusissami peqataaffissaminni akuerineqartumit oqimaannerusarmata. Tilluuttartut kigutiminnut akulaaminnullu illersuuteqarlutik tilluuttarput. Inuussutissarsiutiginagu tilluuttartut pinngitsooratik illersuummik niaqorornaveeqquteqarlutik tilluuttarput. Fight Club Nanoq Innartorneq Innartortartut klubbiat illup iluani, meeqqerivik Puiami, ukiup annertunersaa innartortarput, aasaaneranili sila ajunngikkaangat silami innartortoqartarluni. Qernertunnguit eqqaanni aamma Stanislawip Isikkiviani innartornissamut periarfissaqarpoq. Imeqarfiup eqqaani innartorfissagissaartumi aamma angalaaqatigiittoqakkajuttarpoq, tamaani innartornissamut periarfissagissaarmat. Aasat ilaanni illoqarfik qimallugu allamut innartoriartornissamut, atortunillu nutaaliaasunik misileraajartornissamut periarfissaqartarpoq, soorlu Sermitsiap kangerluanut, imaluunniit Qupimmut. Aapakaaq Innartortartut Peqatigiiffiat, http://klatreklubbenaapakaaq.wordpress.com/
Aarsaarneq (Paragliding) Aarsaartarneq (paragliding) timersuutaavoq kigaallassaamut assingusoq atorlugu aarsaarummik aquttoq timmioraarsinnaalluni. Aarsaartartut sivinganernit qaqqalluunniit killinginit qangattarniarnerminni aallartiffigigajuttarpaat. Aarsaarniarluni qangattarniarnermi sipili atorlugu imaluunniit biilimit nusutsilluni aamma qangattartoqarsinnaavoq. Imaluunniit motoori sarpilik arsaartartup tunuminiitissinnaasaa atorneqarsinnaavoq. Motoori atornagu arsaarnermi silaannaap qangattartitsisarnera atorneqartarpoq, silaannaap kissamik anoreqartitsinera imaluunniit anorip sivinganikkut qummut anorlertitsinera atorlugit. Maximum Paragliders Sportsklub http://www.max.gl/ Nuuk Paragliders Arpalluni sumiissusersiorneq Timersuut arpalluni sumissusersiorneq tassaavoq nunap assinga pujorsiullu atorlugit nunami sungiusimanngisami sumiissusersiorneq. Arpalluni sumiissusersiortoq aallartinnermi nunap assinganik tunineqartarpoq, tassani sapinngisamik sukkasuumik tulleriiaarlugit aqqusaagassat titartarneqarsimasarlutik. Aqqusaagassat pingasunik teqeqqulimmik qaqortumik/aappalungusersumik nunami ilisarnaateqartarput, taakkulu pussugummik imaluunniit elektroniskimik qiorneqartarput. Arpalluni sumiissusersiornermi unammilligassaq tassaavoq sukkasuumik arpannissaq, tassungalu peqatigitillugu tarnikkut eqqissimanissaq, nunallu assinga atorlugu ingerlaniarluni kukkunaveersaarniarlunilu tamanik takunnissinnaasoqarsinnaassalluni. Nunami ilisimanngisami sumiissusersiortoqartariaqarpoq tassungalu peqatigitillugu aqqusaagassat akornanni sukkanerpaamik ingerlavissaq toqqarneqassalluni. Peqataasut unammilligassinniarlugit unammilluni arpannermi ingerlavissiortup peqataasut teknikkikkut piginnaasaat atortinniarlugit ingerlavigineqarsinnaasut arlallit assinngiiaartullu ingerlavissiarisarpai. Nuummi Arpallutik Sumiissusersiortartut Peqatigiiffiat, NASP http://nasp.gl/
Nord Shaolin Kung Fu Akiuulluni unammeriaaseq ullumikkut Nord Shaolin kung fumi sungiusarneqartartoq tassaavoq kung fup assipajaava, akiuulluni unammeriaaseq itsarsuaq Kinami buddhistit mattuttut ineriartortinnikuusaat. Oqaluttuarisaanera mattuttut qangarsuaq ilerfiarlutik angalasarnerannit, malersugaanerannit kung fumik ilinniarfiit isertortuniit maannakkut Europami minnerunngitsumillu danmarkimi ullumikkut aaqqissuussamik sungiusarneqartartoq ineriartorteqqinneqartorlu. Nord Shaolin Kung fumik ilinniarfik Eqaarsaarneq Eqaarsaarneq timikkut sungiusaataavoq meeqqat timikkut tarnikkullu nukittuunngornissaat siunertarineqarluni. Eqaarsaarneq meeqqat timimik atuinerannik ineriartortitsinermik perorsaanikkullu isumassarsianik assigiinngitsunik imaqarpoq, piffissallu ingerlanerani allanngornikuulluni. Eqaarsaarneq timersornikkut tunngaviusumik inissisimavoq, meeqqat timiminnik atuillutik ineriartornissaannik perorsarneqarnissaannillu isumassarsianik assigiinngitsunik imaqartoq. Nuummi eqaarsaartartut peqatigiiffianni timigissarnissaq eqaarsaarnissarlu kisimik pineqanngillat, aammali meeqqat inersimasullu inuit attaveqaqatigiittarneranni naapittarfiattut atorneqarluni. Tassani meeqqat sunngiffimminni meeqqat peqatigiinneranni ilaasarput meeqqeriviit atuarfiillu saniatigut. Meeqqat pitsaasunik misigisaqartinniarlugit sungiusaasut sungiusaanermilu ikiortit pikkorissut sapaatit akunneri tamaasa meeqqanik sungiusaasarput. Nuummi Eqaarsaartartut Peqatigiiffiat adm@nuukgym.gl
Tennis Tennis ketsjerit noqallit atorlugit illup iluani silamilu arsaaqqamik pinnguarneruvoq, tassani arsaaraq unammisarfimmi utersaartittarlugu anaaneqartarluni. Arsaaraq toqqaannartumik imaluunniit nunamut ataasiarluni pereeraangat utertinneqartarpoq. Arnani angutinilu ataasiakkaarluni (single), iligiaarluni (double) imaluunniit arnat angutillugu iligiiarlutik (mixed double) unammisoqartarpoq. Tennis klubben Nuuk Nerrivimmi arsaararneq Nerrivimmi arsaararneq unammisunut marlunnut sisamanulluunniit arsaaqqamik pinnguarneruvoq, tassani batti atorlugu nerrivimmi netti siaarsimasoq qulaallugu arsaaraq utertinneqaqattaartarluni. Siunertaq tassaavoq (tennisimisuulli) akerlerisap kukkutinnissaa. Nunatsinni pissartanngorniunnermi angusarissaaraanni naliginnaasumik Arctic Winter Gamesimi aamma Island Gamesimi unammeqataanissamut periarfissaqarluartarpoq. Timersuut 1988-imiilli Olympiademi unammissutaasarpoq. Nunarsuaq tamakkerlugu unammisartut 30 mio.-nik amerlanerusut nalunaarsorneqarnikuupput, unamminerulli saniatigut nunarsuaq tamakkerlugu atuarfinni, sunngiffimmi sammisaqartarfinni assigisaannilu aamma timersuutaavoq sukisaarsaataallunilu nuannarineqartoq. Nuummi Nerrivimmi Arsaarartartut Peqatigiiffiat, NNAP TTC 12: tatecl12@gmail.com www.nnap.gl
Volleyball Volleyball-i arsamik pinnguarneruvoq, tassa holdit marluk tamarmik arfinilinnik arsartoqartut, arsaq akerlerisap unammiffianut natermut nakkartinniartarlugu. Tennisitut sulorarnertullu unammiffik nettimik avissimasarpoq, taakkunanilu holdit taakku marluk avissimasarput. Isikkamik arsarnertut, aamma assammik arsarnertut volleyball holdikkaarluni timersorneruvoq, sumiffinni, nuna tamakkerlugu aammalu nunat tamalaat akornanni unammissutaasarluni. Qaffasissumik unammisarnerni angutit arnallu immikkut unammisaqat-taartarput. Mix volley taamaallaat appasinnerusumik unammiuaarnerni pinnguaataasarpoq, tassani inuit attaveqaqatigiittarnerat pingaarnerugajuttarluni. GSS Volleyball, Polar Volleyball, gssvolley@gmail.com http://www.volleyball.gl/ http://www.pvn.gl/ Sisoraatinik arpanneq Sisoraatinik arpanneq ukiukkut timersuutaavoq, tassani unammisaniit sukkanerusumik arpaffik ingerlaffiginiarneqartarluni. Sisoraatinik arpannermi (alpinimik sisorarlutik timersortartut akerliannik) qummut, ammut siumuinnarlu ingerlanissaq sungiusarneqartarluni. Sisoraatinik arpanneq tamakkerlugu timersuutit ilaattut isigineqartarpoq. Timimi nukiit tamarmik sungiusarneqartarput, aammalu uppinnaveersaarnissamut timimillu ataatsikkut atuinissamut annertuumik piumasaqaateqarfiulluni. Timigissarnermut sunniutai annertupput, aammalu unammilluni sisoraatinik arpannermi sisoraatinik eqqortumik perrassaagaanni, kiisalu qanoq iliornissamik aalajangiigaanni minutsinik sekuntinillu annaasaqannginnerulluni ingerlasoqarsinnaalluni. NSP Nuummi Sisorartartut Peqatigiit,, nsp@greennet.gl http://www.nsp.gl/ Nuummi Ujakkaartartut Peqatigiiffiat info@nup.gl http://www.nup.gl/
Sisupiloorneq sangusaarnerlu Alpinimik sisorarnerit sisorarnernut Alpenit aallaaveqarlutik pinngortunut ataatsimut taaguutaavoq. Sisorarnerit pineqartut tassaapput: sisupiloorneq sangusaarnerlu, kiisalu storslalom aamma super-g, taakkulu siullertut taaneqartut assipajaavisut isigineqarsinnaapput. Alpinimi sisorarnerit ilisarnaatigaat kamippaat, taamaalillunilu isikkat sisoraatinut aalangeersimasarmata, nunani avannarlerni sisorariaatsit akerliannik, tassani kimmik sisoraammi ukamartinneqarsinnaalluni sisoraammut isikkat qajannaarneqartarmata. Alpinimik sisorarnermi apuuffissamit qaffasinnerungaartumit aallartoqartarpoq, taamaalilluni sisorarnerni tamatigungajak ammukajaaq ingerlasoqartarluni. Sisorarfik portinik akunnattoorfissanillu ilisarnaaserneqartarpoq, taakkulu sisorartut sukkanerpaamik ingerlaffigisussaavaat. NS-84 http://www.ns84.gl/ Biathlon Sisorarluni eqqaasarneq, aamma taaneqartartoq biathlon, tamanik timersorneruvoq tassani timersuutit marluk ataatsimoortinneqartarlutik, sisoraatinik arpanneq aamma aallaat 22 kaliber atorlugu eqqaasartoqartarluni. Sisorartut arpalluni sisorarfik eqqaasarfimmut ingerlaffigisarpaat, tassani eqqoriagassaq 50 miiterinik ungasissusilik eqqaasarfigisarlugu, pallorluni nikorfalluniluunniit. Sisorartup eqqugiagassaq unioruniuk pillaammik ingerlarfissiaq/iat ingerlaffigisarpai imaluunniit piffissamik ilasisoqartarluni. Aasami Biathlonerneq tassaavoq sisoraatinut paarlaallugu nalinginnaasumik arpanneq, imaluunniit rulleskit atorlugit arpanneq. Nuummi maannakkut eqqaasarfeqanngilaq, ilimagineqarporli Nuummi 2016-imi Arctic Winter Gamesimut atatillugu sanasoqassasoq. Nuuk Biathlon Klub biathlon@greennet.gl
Snowboard Snowboardernermi isikkat ataannut bindingit atorlugit isikkat qajannaarneqartarput, aammalu qaqqakkut sisoorfimmilu aputilimmi ammut sisusoqartarluni. Sisorarnertut nalinginnaasutuulli ajaappissat atorneqarneq ajorput. Snowboardit assigiinngitsorpassuupput, nalinginnaasumilli immikkoortunut ukununnga agguataarneqartarlutik: Freeride/All-mountain, soorlu taaguutaata tikkuukkaa assigiinngitsunut atorneqartarpoq. Sisorarfimmi sisorarfiullu avataani. Boardi akunnattumik angissuseqarajuttarpoq, akunnattumik silissuseqarluni assigiinngitsunullu atorneqarsinnaagajulluni. Freestyle assigiinngitsunut atorneqartarpoq, ilaatigut pissinneq, ungaluusat qaavatigoorneq aammalu halpipekkoortoqartarluni. Boardi taamaattoq ataatsimut isigalugu silinnerusarpoq, naannerulluni aqinnerullunilu. Alpinboard immikkorluinnaq ittoq. Alpinbordit qeratasuujupput, angillutik silinnatillu aammalu støvlit qeratasoorujussuit sisoraannarluni atorneqartartunut eqqaanarnerusut atorneqartarlutik. Tamassuma saniatigut boardeqarpoq sisorarfiit avataanni apummi aqitsumi atorneqartartunik, imaluunniit randonee-snowboardit ingutserlugit sisoraatinngortinneqartartut atorneqartarput. Snowball Nuuk (PS3) Kivittaarineq Kivittaanerineq nukkassarluni timersuutaavoq, tassani assigiinngitsut pingasut unammissutigineqartarlutik: squat (nissut peqitsillugit), nallangalluni aamma kivitsiinnarluni. Timersuut oqimaatsunik kivittaarinermut assinguvoq, tassa pingasoriarluni misiliinermi oqimaannerpaanik kivitsiniartoqartarmat. Tassani kivitat katineqartarput imaluunniit pingasoriarluni unamminertut taaneqartarlutik, tassani kiilut tamarmiusut katinneqartarlutik. Aamma ataasiarluni kivitsisoqartarpoq, tassani taamaallaat nallangalluni kivitsisoqartarpoq. Kivittaarinermi pointilersuut Wilksimik taaneqartartoq atorlugu oqimaassutsit assigiinngitsut unammissutigineqartarput. Styrkeløft og Armbrydning Nuuk styrkeogarm@gmail.com
Armbrydning (Talimmittaanneq) Tallimmittaanneq (Qallunaatut taallugu armbrydning) inuit marluk timikkut, teknikkikkut, periutsikkut nukittussutsikkullu unammiffigisarpaat. Taakku marluk nerrivik akunnermiliullugu akileriillutik nikorfasarput. Aallartittoqartarpoq ikuseq narlortillugu, dommerilu oqaraangat ready go unammineq aallartittarpoq. Dommerip unamminerup timersortartorpalaartumik isumannaatsumillu ingerlanneqarneqarnissaa isumagisarpaa. Unammisap assaa nerrivimmut tutsikkaanni ajugaasoqartarpoq. Oqimaassutsit tunngavigalugit aammalu tamat akornanni unammisoqartarpoq. Styrkeløft og Armbrydning Nuuk styrkeogarm@gmail.com Karate Nuuk Shotokan Karate Do ullumikkut 100-t sinnerlugit ilaasortaqarpoq. Klubbimi ilaasortat akornanni ataqatigiilluartoqarlunilu ikioqatigiilluartoqarpoq. Sungiusarnerit saniatigut assigiinngitsunik aaqqissueqatigiittoqartarpoq. Klubbip illuani dojomik taaneqartartumi ulluinnaat tamaasa sungiusartoqartarpoq. Sumiiffia tassaavoq Kissarneqqortuunnguaq 4, Godthåbhalip qulaatungaani qattunermi. Karate ataasiakkaarluni sungiusarneruvoq, taamaalilluni ukiut, suiassuseq qasujaallisarsimanerlu apeqqutaatinnagit tamanit sungiusarneqarsinnaalluni. Karatemi timi kisimi sungiusarneqarneq ajorpoq, aammali tarneq, tassa karatertartutut imminut aqussinnaaneq teknikkillu sungiusarneqartarmata. Kikkulluunniit tikilluaqqusaapput, meeqqanit tallimanik ukiulinniit ilaasortanut utoqqaanerusunut, taakkunanngalu marluk 60-it sinnerlugit ukioqarlutik. Nuuk Shotokan Karate-Do www.shotokan.gl
Taekwondo Tae Kwon Do koreamiut unammillutik timersuutigaat, tassani isimmitsinerit, patitsinerit assiinerillu atorneqartarlutik. Koreami unammilluni timersuutit assigiinngitsorpassuit matumani katitinneqarnikuupput, taakkulu immikkut tamarmik Kinami sumiiffinnit assigiinngitsuneersuupput, buddhistit akiuuteriaasianeersuullutik. Timersuutip aallaavia taekyonimeersuuvoq. Tae isumaqarpoq isigak aseruisartoq, Kwon isumaqarpoq assak aseruisartoq taavalu Do tassaalluni tarnikkut qaffasissumik pisinnaasaqarneq, inooriaatsikkut, kulturikkut, ingerlavikkullu. Nuuk taekwondo klub nuuktkd@gmail.com http://www.ntk.gl/ Kyusho Peqatigiiffimmi Kyusho, kangiamiut unammillutik timersoriaasitoqaannit aallaaveqartoq, sungiusarneqartarpoq, tamatumani anniartarnerup annertunerpaamik killinga anguniarneqartarluniaammalu timip pissusaa pillugu ilisimasaqarnissaq. Isiginiarneqartut tassaapput avatit, nukiit, aap sianiutillu ingerlaarfii. Ilisimasat taakku aallaavigalugit isimmitsinerit patitsinerillu immikkorluinnaq ittut ineriartortinneqarnikuupput. Aalanerni periutsit arfineq marluk atorneqartarput, nalinginaasumillu sisamaqiusanngorlugit marloqiusanngorlugillu atorneqartarlutik. Periutsimi Ying Yang aamma TCM meridian teoriit tunngavigineqarput. Kyusho Greenland www.kyushogreenland.com Golfi Golfertarneq aatsaat taama soqutigineqartigilerpoq. Inuusuttut utoqqaanerusullu golfertarfimmiittarnitik, aammalu ukiuunerani illup iluani golfertarnitik nuannarisaqaat. Klubbimi ilaasortat ataqatigiilluarput. Nuuk Golf klub info@nuukgolf.gl
Isikkamik arsarneq Isikkamik arsarneq Kalaallit Nunaanni nuannarineqarnerpaat ilagaat. Isikkamik arsarnermi sukkasuumik sukkavallaanngitsumillu arpannerit atorneqartarput. Taamaammat isikkamik arsarnermi qasujaallisarneq aammalu sukkasoorujussuarmik arpassinnaaneq sungiusarneqartarput. Unamminerup ingerlanerani unammisut ataasiakkaat kilometererpassuit atorsimasinnaasarpaat. Qaffasissumik unammisartut ilaasa unamminermi 10 kilometerit sinnerlugit atorsimasinnaasarpaat. B-67 Isikkamik arsarneq http://www.b-67.gl/ GSS Isikkamik arsarneq, nukarliit http://www.gss.gl/ GSS Isikkamik arsarneq, angutit GSS isikkamik arsarneq, oldboys Nûk Isikkamik arsarneq, http://www.fcnuk.gl/ NÛK Isikkamik arsarneq Oldboys IT-79 FC Nuuk Sinerik FUTSAL
Assammik arsarneq Assammik arsarneq aap ingerlaarneranut, qasujaassutsimut nukinnullu annertunernut tamanut iluaqutaavoq. Iligiikkaarluni unammineruvoq nuannersoq, periusissamik aallajangiiffiusartoq amerlasuutigullu ikinngutigiinnermik pilersitsiviusartoq. Assammik arsarnermi skuut illup iluani atorneqartartut ajatsilluarnartut pisariaqartinneqartarput, aammalu seeqqunut illersuutit pisariaqarsinnaallutik. GSS Assammik arsartartut http://www.gsshaandbold.gl/ Nûk Assammik arsartartut http://www.nuk.gl Sulorarneq Sulorartartut klubbiat kikkunnullunniit timiminnik aalatitserusuttunut holdeqarpoq. Meeqqanut holdeqarpoq, meeqqanut soqutiginnittunut tamanut inissaqartitsisumi, tamassuma saniatigut timigassarluni unammiffimmik attartornissamut periarfissaqarpoq. Klubbi aamma sulorartartunut pikkorinnernut immikkoortortaqarpoq, Kalaallit Nunaanni pissartanngorniuunnernut, Island Gamesimut aammalu Arctic Winter Gamesimut peqataasussanik ineriartortitsinissamik siunertaqarluni ingerlanneqartumik. B-67 badminton http://www.b67badminton.gl/
Inuit Pinnguataat Arctic Sports, aamma Inuit Pinnguaataattut Dene Gamesitullu ilisimaneqartut kulturikkut pinnguaatersornerupput kinguaarippassuarni ingerlateqqinneqarsimasut. Unammiuaarnerit ingerlanneqartarput nuannisaqatigiinnermi, aammalu piniarnermut assigisaannullu sungiusaatitut atorneqartarlutik. Pinnguaatersornerit tamakku maanna unammiuaarutigineqartalersimapput. Inuit Pinnguaataat atorlugit unammiuaarnerni peqataaffigineqartartut annertunerit marluk tassaapput Arctic Winter Games aamma World Eskimo-Indian Olympics. WEIOS ukiut tamaasa Alaskami ingerlanneqartarpoq, AWGlu ukiut allortarlugit nunani assigiinngitsuni ingerlanneqartarluni. Inuit Pinnguaataat 50-t angullugit assigiinngitsunik timersuutitaqarpoq. Assigiinngitsut amerlanerujussui pissutigerpiarlugit ikittuinnaat unammiuaarnerni atorneqartarput. Soorlu AWGmi aqqaniliinnaat ukuusut unammiuaarutigineqartarlutik: One foot high kick Two foot high kick Kneel jump Alaskan high kick Triple jump One handreach Airplane Knuckle hop Sledge jump Head pull Armpull. Ajugaanissaq soorunami pingaaruteqartarpoq, pingaartinneqarnerpaasarporli unamminermi akeqqat pitsaanerpaamik angusaqarnissaat tunaartaralugu ikiuunnissaq. Unammiuaarnerni ullormut angusat saqqummiunneqarnerini unammeqataasut ersersittarpaat inuit pinnguaataannik timersorneq allanik aamma pingaartitsiviusoq. Inuit Games / Kalaallit pinnguaataat Arpanneq Allarpassuit assigalugit qasujaallisarusullutit, sanigorniarlutit imaluunniit ulluinnaq ulapaarfiusoq qimalaarusullugu appattartut ilagippatsit. NAAPE (Facebookimi NAAPE-mi attavigineqarsinnaavoq) www.marathon.gl
Qajartorneq Qajaq tassaavoq angallat mikisoq, amitsoq takisoorlu paatersorluni ingerlanneqartartoq, qajartortoq ingerlavik isigalugu issiasarpoq. Qajaq nalinginnaanerpaaq inummit ataatsimit atorneqartarpoq. Peqatigiiffik tassaavoq qajartortartut peqatigiiffiat, kalaallit qajatoqaannik sananissamik qajartortarnissamillu pingaarnertut siunertalik. Erseqqissaatigineqassaaq isumaammatilaasortat ukiuunerani namminneq qajassaminnik sanaartortarnissaat, aasaanerani aaqqissuussinernut assigiinngitsunut atortagassaminnnik. Peqatigiiffik ilaasortanut qajaqanngitsunut qaannanik attartortitassanik arlaqanngitsuinnarnik peqarpoq, tamarluinnangajammillu meeqqanut attartortitassaallutik. Taamaammat inersimasunut qajaqanngitsunut ilaasortat allat attartortitserusussuseqarnerat isumalluutaavoq. Sammisaqartitsisarnerilli kalaallit qajatoqaannut kisimi atuutinngilaq, qaannanik allanik qajartortartunik peqatigiiffik aamma ilaasortanngortitsisarmat. Qajaq Nuuk Peqatigiiffik http://www.qajaqnuuk.gl/ Basketball Basketball tassaavoq holdit marluk atorlugit timersorneq, holdillu tamarmik immikkut tallimanik arsartoqarlutik unammisarlutik. Unammisap koorianut arsaq ikillugu pointinnattoqartarpoq. Holdit unamminerup ingerlanerani pointinnannerpaat ajugaasarput. Baskeball nunarsuarmi timersuutit nuannarineqarnerpaat atorneqarnerpaallu ilagaat. Baskeball unammilluni timersuutitut illup iluani ingerlanneqartarpoq, timersuulli silami aamma atorneqartarpoq, tassani ilaatigut streeball atorneqartarluni. Ajagaq BK Nuuk http://ajagaq07.com/
Thaiboksning Thai/Kickboxingimi niaqqumut, naanut, uppatinut, seeqqununillu isimmitsineq patitsinerlu atorneqartarput. Aamma ikutsit atorneqarluarsinnaapput, kisiannili patitsineq, isimmitsineq seeqqullu atorneqarnerusarput, nuannariinnarlugu timersuummik ingerlatsisunut ikutsit atorneqaqqusaanngimmata. Team Colosseum Greenlandip sungiusarnerini makku pingaartinneqarput: Workout Qasujaallisarneq Teknikki Illuatungeqarluni sungiusarneq/unamminissamut sungiusarneq Ataatsimoorneq Thai/Kickboxing timimik nukittorsarusuttunut, kamassamik anisitserusuttumut, imminullu tatiginerulerusuttumut tarnikkut ilorrisimaarnerorusuttumut, inupassuarnillu inussiarnersunik naapitserusuttumut piukkunnarpoq. Team Colosseum Greenland Kampsport Mixed Martial Arts (MMA) tassaavoq paalluni timersoriaatsit assigiinngitsut aallaavigalugit paalluni timersornerit arlallit atorlugit peqataasut ajugaaniuunnerat nutaaliaasoq; tamanna tunngavigalugu ateqaatigaa Mixed Martial Arts. Timersuut ukiorpaalukasinni iluarpallaanngitsutut isigineqarnikuuvoq, timersuut Ultimate Fighting -itut ilisimaneqarmat. Isiginnaartartut akuersaarnerunissaat siunertaralugu timersuummi malittarisassat allanngortinneqarnikuupput. Unamminerit ungalusami ringimiluunniit ingerlanneqartarput, unitsinneqartarlutillu dommerip naliliinera naapertorlugu unammeqataasut arlaat imminut illersorsinnaajunnaaraangat, ilisimajunnaartoqarpat, toqqusassiisoqarpat imaluunniit peqataasut arlaata nateq unammisarluunniit pattallugit tunniutiinnarpat, taaneqartartumi Tap-Out Nuuk MMA
Sikkilerneq Sikkilernissamut arlalinnik pissutissaqarpoq, soorlu; Sikkilerneq arpannermit artornannginneruvoq. Assersuutigalugu seeqqulunneq pualavallaarnerluunniit ajornartorsiutigigukkut sikkilerneq timigissaataalluarsinnaavoq. Sikkilerluni timigissarneq qasujaannerulersitsisarpoq, taamaalilluni anertikkarpallaarunnaarsitsisarluni, timip iltimik tigooraasinnaanera pitsanngortinneqartarmat. Uummatip nukii aamma aap ingerlaanera pitsaanerulersinneqartarput.. Akuttunngitsumik sungiusartaruit taqqavit qerattartoornissaat uummatikkullu nappaateqalersinnaanerit annikillisinneqarsinnaapput. Timi eqaannerulersarpoq aalassarinnerulersarlunilu, taamaalillutit ajoqusersinnaanerit annikinnerulersinneqarsinnaallu.nukitit nakuunerulissapput, qasusuinnerulerlutit kaloriamillu atuinerit pitsaanerpaajussalluni. Taamaammat sikkilinik timigissarneq sanigorsaataalluartarpoq. Siunnersuutitsialaat Sunilluunniit assigiinngitsunik timersortaruit imerluartarit. Nukiit pitsaasuussappata imerpalasut pisariaqarput,taamaammat imermik, juicemik assigisaannilu imerluartarnissaq pingaaruteqarpoq. Nerilluartarit Kulhydratit annertuumik timippit pisariaqartippai. Kulhudratit soorlu pastanit, qaqorteqqasunit naatsiianillu pissarsiarisinnaavatit. Utoqqaanerusut timersornerulerput Timersornermi pissarsiat Timi atorluarlugu inooriaaseqarneq: allat ikiuinissaat isumalluutiginagu sivisunerusumik inuusinnaaneq annertusisarpoq peqqinnerunissaq anguneqartarpoq napparsimanerit ajoqusernerillu qaangilertornissaannik kinguneqartarpoq uppinnisaq pitsaaliorneqartarpoq inuunerup pitsaassusaanut sunniuteqartarpoq timimik aalatitsilluartarnikkut ilaatigut uummatikkut nappaatit, aap naqitsinerata qullasippallaarnera, sukkorneq type 2 aamma saarngit napianerat pinaveersimatinneqartarput. Timersoqatigiiffik Qeersaat
Snescootererneq (Qamutseralanneq) Snescooterimik angalaarneq ukiumi timersuutaavoq inunnut motorilimmik timersuuteqarnermik, silamiinnermik allanillu sammisassatigut ataatsimooqatigiinnermik nuannarisalinnut Snescooterimik angalaarneq timikkut anersaakkullu unamminartoqarsinnaavoq, pissutigalugu Nuup eqqaani nunap qaqqartuujunera teknikikkut timersornikkullu piumasaqaatitaqarsinnaammat. Snescooterertartut peqatigiiffiat Qamutit peqatigiiffiuvoq ilaasortaminut, nalinginnaasumillu snescooterimik angalaarnermik sullissisoq. Peqatigiiffik ukiut tamaasa 100 missaani ilaasortaqartarpoq. Qamutini ilaasortaagaanni pisiniarfinni aalajangersimasuni, snescooterinut tunngasunik najoqqutilinni akikillerutitalimmik pisisoqarsinnaavoq. Snescooterertartut peqatigiiffiata ilaatigut makkua pigisarai: snescooterinut hali, snescooterinut ilitsivigalugu imaluunniit snescooterimik iluarsaassiffigalugu Sakkuuterpassuit aamma sannatit immikkut sanaat Illuaraq ataatsimuualaarfik unnukkut ataatsimoorfiusinnaasoq oqaloqatigeerujoorluni, atuagassiat snescooterimut tunngasut atuarlugit imaluunnit snescooterertunik DVD-liat isiginnaarlugit Umiatsiaaraq aamma prammi sisak, sikoqannginnerani ilaasortat snescooteriinik angallassissut Nioqqutissiat assigiinngitsut soorlu racer-motorolie, snescooterip atortui annikittualuit, aamma snescooterertartut atisaat torrallatat akikittumik pisiassat Qamutit www.qamutit.gl www.facebook.com/qamutit
Timersoqatigiiffinnut tapiissutit Peqatigiiffik tapiissutinik pissarsiaqarsinnaatitaassappat taamaallaat tapiissuteqartoqarsinnaavoq tapersiisoqarsinnaallunilu ukiut tamaasa kingusinnerpaamik 1. maji uku kommunimut nassiunneqarsimappata: Malittarisassat Ukiumoortumik naatsorsuutit kukkunersiukkat (Peqatigiiffiit ingerlareersut) Ataatsimeersuarnerni oqaluuserineqartut Ataatsimeersuarnermi imeqarniliaq Ilaasortat allattorsimaffia nutartigaq Siulersuisut katitigaanerat (Nalunaarsuinermi immersugassaq) Kommuni nalunaarfigeqqaarnagu kinaluunniit timersoqatigiiffimmik peqatigiiffimmilluunniit pilersitsisinnaavoq, taamaattorli peqatigiiffik tapiiffigineqarnissamik qinnuteqassappat peqatigiiffik kommunimi nalunaarsorneqarsimassaaq piumasaqaateqarlunilu. Kommuni assigiinngitsunik periarfissiisinnaavoq. Paasissutissat annertunerusut pissarsiariniarlugit sumut saaffiginnissinnaanerit pillugu ataaniittut takukkit. Kommuneqarfik Sermersuup tapiisarnermut malittarisassai nalunaarsorfissaq aammalu qinnuteqarnerni immersuiffissiaq uani aaneqarsinnaapput: www.sermersooq.gl/innuttaasunut/timersorneq sunngiffillu/ imaluunniit timersornermut siunnersorti attavigiuk Lars Jørgen Petersen annertunerusumik paasisaqarusukkuit Tamanut Kiffartuussivik, Kuussuaq 2, tlf. 36 73 22-mut saaffiginninnikkut. E-mail: Peqatigiiffiit@sermersooq.gl / lajp@sermersooq.gl Attaveqarfissat sungiusartarfiit piffissallu Attaveqarfissanik aammalu sungiusartarfiit piffissallu nalunaarsornerinut annertunerusumik paasisaqarfigerusukkukkit timersornermut siunnersorti Lars Jørgen Petersen attavigisinnaavat oqarasuaat 36 73 22 aammalu e-mailikkut lajp@sermersooq.gl Malugiuk attaveqarfissat tamakkiisut uani ilaatigut allaqqanngillat sillimaniarneq illersuinerlu peqqutaallutik, attaveqarfissat arlallit tamanut ammasunik attaveqaateqanngimmata.