PASIFIK LOKOL PEJ MESEJ BLONG ERIA SEVENTI Mekem Moa Man I Kam long Sakramen Miting I Kam long Elda Robet J. Dadfil Taem yumi stap go long Sakramen miting evri wik, yumi kasem wan janis blong luklukbak long ol kavenan we yumi bin mekem taem yumi tekem tabu bred mo wota; mo taem yumi mekem hemia, yumi kam niu bakegen. Odinens blong sakramen i mekem se miting ia i moa tabu mo impoten insaed long Jos. Elda Dalin H. Oks i talem: Taem yumi mekem bakegen ol kavenan blong baptaes blong yumi wetem ful tingting mo tru hat, mo taem yumi tekem sakramen, yumi stap mekem yumi kwalifae bakegen from promes ia se bae yumi gat Spirit blong Hem i stap wetem yumi oltaem. 1 From hemia nao, wan long Ol Gol blong Eria i lukluk nomo blong stap mekem namba blong ol memba we oli kam long tabu miting ia i kam antap. Wetem promes ia long maen blong yumi, kwestin i kam se:?olsem wanem bae yumi mekem moa man i kam long sakramen miting? Blong mekem moa man i kam, i save happen long fo defren wei. Saes blong famle i kam bigwan tru long ol niu bebi we oli bon Ol niu memba oli muv i kam insaed long branj Ol baptaes blong ol konvet Frut blong wok blong tekem ol memba oli kambak long Jos Faswan Saes blong famle i kam bigwan tru long ol niu bebi we oli bon Doktrin abaot famle, God i bin mekem i klia long Adam mo Iv taem Hem i givim komanmen long tufala blong go mo gat plante pikinini. Doktrin abaot famle i impoten semmak long yumi tedei. Elda Nil L. Andesen i bin talem: Wetaem blong gat pikinini, mo hamas pikinini blong gat, oli ol praevet desisen we i mas tekem ples bitwin wan hasban mo waef, mo Lod. Oli ol tabu desisen blong tekem ol desisen we oli mas mekem wetem prea wetem ful tingting, mo oli mekem folem ansa blong prea wetem bigfala fet. 2 Taem yumi tijim ol pikinini wetem gospel, wetem fasin blong go long sakramen miting evri wik, hemia i givim olgeta janis blong oli lanem abaot Sevya mo lav we Sevya i gat long wanwan long yumi. Nambatu Ol niu memba oli muv i kam insaed long branj Long wan wok we mi bin gat blong mekem long wan stek konfrens we i jes pas long Brisban, Ostrelia, wan memba i kam luk mi, i ting se mi mi Stek Presiden. Hem i talem se hem mo famle blong hem oli jes kam long ovasi, mo i bin jusum eria ia we mifala i stap mit long hem olsem jeneral eria we hem i wantem famle blong hem blong go long hem. Afta, hem i talem wan samting we i ring long sora blong mi: Insaed long famle blong mifala, i gat ol YSA, yut, mo praemeri pikinini.?wijwan branj blong yu nao bae mifala i save givim seves long hem? Hemia bae i talemaot weaples nao bae mifala i stap long hem. Yu save filim se, famle ia, hem i andastanem se taem oli putum Lod i kam faswan, bae ol blesing oli kam folem. Elda Robet J. Dadfil Oktoba 2014 P1
Nambatri Ol baptaes blong ol konvet Long Semina blong Ol Misin Presiden long yia 2013, Presiden Monson i talem: Naoia i taem blong ol memba mo ol misinari oli kam tugeta, oli wok tugeta, oli wokhad insaed long plantesen blong Lod blong tekem ol sol oli kam long Hem. Lod i mekem ol samting oli rere blong yumi serem gospel long plante kaen wei, mo bae Hem i helpem yumi long ol wok blong yumi sapos yumi mekem wok wetem fet blong mekem wok blong Hem i hapen. 3 Sosol media we i stap kam antap naoia i givim ol janis i bitim bifo blong serem gospel long wan fasin we i no mekem man i fraet. Presiden Hinkli i bin talem: Ol fultaem misinari oli save tij, be ol memba, long weaples oli stap, bae i givim sapot long misinari seves ia taem oli openem hom blong olgeta blong wok ia i hapen. 4 I gat sam taem we mi stap prea se bae ol misinari bae oli faenem ol pipol blong oli tijim. Taem mi stap tingtingbak long toktok ia, mi luksave se, faswan mo moa impoten, hem i responsabiliti blong mi blong faenem ol pipol blong ol misinari oli tijim. Taem yumi stap prea blong faenem sam janis, jalenj bae i blong yumi lisingud long kwaet toktok blong Spirit, blong mekem se yumi save luksave taem ol janis ia oli hapen, mo afta, blong yumi tekem aksen folem, be i no blong lego janis i pas mo stap askem wanem i bin hapen. Taem we Elda Piason i mekem yumi tingbaot long Eria Presidensi Brodkas long Febwari 2014, i gat tri kaen pipol i stap; olgeta we oli stap mekem samting i hapen, olgeta we oli stap luk samting i stap hapen, mo olgeta we oli stap askem olgetawan wanem samting nao i stap hapen. 5!Lod i givim janis long yumi blong mekem ol samting oli hapen! Long en, oli setem ol misinari apat blong oli tijim gospel, from se wan profet blong God i givim raet long olgeta.!taem yumi wok tugeta olsem ol memba mo ol misinari long tabu wok ia folem singaot blong wan profet we i stap laef, yumi stap luk ol merikel oli hapen stret long fored blong ae blong yumi! Nambafo Frut blong wok blong tekem ol memba oli kambak long Jos Plante wok i stap hapen blong mekem ol memba oli kambak long Jos raon long Pasifik Eria taem ol memba mo ol misinari oli stap wok tugeta blong go aot blong sevem ol man. I gat fulap stori blong ol memba we oli kambak long Jos afta we oli bin stap longwe long Jos blong plante yia; be taem oli kambak blong felosip wetem olgeta Sent,!oli stap tekem ol memba blong famle blong olgeta we oli no memba mo ol fren blong olgeta oli kam wetem olgeta! Long wan visit blong sevem man we mi tekpat long hem, Bisop, wan fultaem misinari mo mi, i bin visitim hom blong wan lesaktiv sista. Oli bin putum apoenmen wan wik bifo mifala i go visit, mo i kamaot klia se taem mifala i kasem hom ia, Spirit i bin mekem olgeta oli rere. Hasban, we i no memba, i welkamem mifala long doa, mo bifo mifala i talem wan samting, hem i talem se hem i save from wanem mifala i go visit. Mifala i sapraes smol long toktok blong hem, mifala i askem hem se wanem nao tingting blong hem abaot stamba tingting blong visit blong mifala. Kwiktaem, hem i eksplenem: Bae yufala i invaetem mi blong kasem baptaes. Bifo mifala i gat janis blong ansa, hem i eksplenem bakegen: taem mi bin stap rere from visit blong yufala,!mi bin filim se i taem naoia blong mi kasem baptaes! Traem tingting long sapraes blong mifala long welkam ia we mifala i no bin tingting nating long hem. Mifala i gat wan gudfala visit wetem famle ia. Mifala i bin givim ol invitesen wetem insperesen, wetem wan spirit blong lav mo famle ia i bin akseptem ol jalenj. Waef blong hem i kambak long Jos, mo man ia mo ol trifala pikinini blong hem oli bin kasem baptaes. Las taem we mi bin luk famle ia i bin taem mi bin luk hasban mo waef ia, tufala i nildaon raon long tabu olta long tempol wetem ol trifala pikinini we oli dresap waet, mo P2 Liahona
oli sil olsem wan famle we i no save finis. I bin wan naes samting blong luk. Evri samting ia i hapen from wan i kasem wan kwaet toktok blong Spirit, oli mekem ol apoenmen blong visit, mo oli bin mekem wan invitesen wetem insperesen. Taem yumi putum wok mo ol fas wok blong yumi oli lukluk faswan long Sevya, wetem lav we i pusum yumi, nao ol merikel oli hapen.?hu i nidim wan odinens? Hemia, hem i wan famle we i kasem blesing tru long ol odinens blong gospel, mo taem hemia i hapen, famle i letem paoa blong God i kamtru long laef blong olgeta. Presiden Hinkli i bin talem: Yumi talem tangkyu long Lod, we wok ia i blong Hem, from ol Jos i stap gro bigwan. Fet we i kam strong moa blong ol pipol ia, i kamaot klia taem namba blong ol man mo woman long sakramen miting i stap kam antap, mo taem namba blong ol memba we i go long tempol i stap kam antap... hemia i wan saen blong lav we oli gat long Lod mo ol bigfala blesing we Hem i stap givim. 6 Lod i stap muvum wok blong Hem i go hariap, mo taem namba blong ol pipol we oli stap kam long sakramen miting i stap kam antap, hemia i pruf blong ol joen wok blong muvum wok blong sevem man. Taem Hem i stap mekem wok blong Hem i stap muv hariap, mi hop se bae wanwan long yumi tu i mekem wok blong yumi i muv hariap. Taem yumi gohed blong leftemap namba blong ol memba we oli stap kam long sakramen miting raon long Pasifik, mi prea se bae wanwan sakramen miting ia, bae i wan eksperiens long saed blong spirit we bae i mekem fet mo testemoni i kam strong moa, 7 taem yumi stap lukluk nomo long Sevya mo Gospel blong Hem we i gat paoa. OL REFRENS 1. Dalin H. Oks, Always Have His Spirit, Ensign, Novemba 1996, 59. 2. Nil L. Andesen, Children, Liahona, Novemba 2011, 28. 3. Tomas S. Monson, 2013 Semina blong Ol Misin Presiden. 4. Godon B. Hinkli, i kam long wan satelaet brodkas we hem i givim long Sol Lek Tabenakol long 21 Febwari 1999. 5. Kevin W. Pieson, Eria Presidensi Brodkas, Febwari 2014. 6. Godon B.Hinkli, He Slumbers Not, nor Sleeps, Ensign, Mei 1983, 5. 7. Handbook 2, Meetings in the Church, 18.2.2. LOKOL PEJ Lanem Samting long Ol Sent long Papua Niu Gini I Kam long Elda mo Sista Nom Taem mifala i putum leg long graon blong Papua Niu Gini long Mei 2013, mifala i filim Spirit blong God, mo mifala i gat wan strong testemoni se fet i kam fastaem long ol merikel we God i mekem.!mifala i luk ol merikel oli hapen! Long fas Sandei blong manis, oli tekem mifala i go long Saevara Branj we i stap aotsaed smol long Pot Moresbi. Mifala i joen wantaem wetem niufala famle blong Jos. I bin wan eksperiens we i bin gud tumas blong misin blong mifala. Japel i no gat haoswol, i no gat tapi long wud floa, i no gat matres long jea, i no gat lektrik, mo i no gat ples blong pakem trak, from se ol memba oli no gat trak. Oli wokbaot plante aoa blong kasem Jos, long hot san mo long das blong hot taem, mo long ren mo sofmad long taem blong ren. I no gat wan i stap komplen. Mifala i laekem tumas blong go long Branj ia evri wik, mo mifala i no save se Lod i gat wan plan blong mifala i mekem i hapen. Long Oktoba blong yia 2013, 9 Mael Distrik i joen wanples, mo oli stanemap Gerehu Distrik. Saevara Branj, oli oganaesem bakegen mo i kam namba 8 Mael Branj. Oktoba 2014 P3
ELDA JEFRI D. KAMING I GLAD BLONG SEREM FOTO IA. Ol memba blong 8 Mael Branj oli save holemtaet 100% blong ol niu konvet blong olgeta taem oli felosip wetem olgeta mo serem ol misinari eksperiens blong olgeta. Plante long ol memba we oli bin singaotem olgeta long ol lidasip posisen, Prishud atoriti lidasip, we i singaotem olgeta long ol koling ia, oli no bin save gud olgeta. Oli bin singaotem olgeta tru long insperesen we i kam long God. Long Branj Presiden (Presiden Tomas Aji), hem i fas koling blong hem; fas kaonsela (Brata Kit Ramo), i wan we i jes kambak long misin mo i stap long haos fo manis nomo; mo long seken kaonsela (Brata Nasvil Wararu), hem i fas koling blong hem tu. Nomata misin blong mitufala i blong rekodem ol rekod blong man i bon, i ded, mo mared we oli stap long PNG Akaev i go long dijitol, mitufala i gat blesing taem Misin Presiden blong mifala i singaotem mitufala long ol posisen blong lidasip long Branj blong tijim olgeta long ol lidasip skil. Long fasfala Sandei afta we oli singaotem olgeta, be oli no setem olgeta apat yet, tingting blong olgeta blong wantem muvum wok blong Lod i go hariap, i kamaot klia. Taem mifala i kasem Japel, ol Yang Man, ol Yang Woman, mo Praemeri oli sidaon long ol stul andanit long ol tri, mo oli statem lesen blong olgeta finis. Ol tri i klasrum blong olgeta from se i no gat klasrum insaed long Japel. Mifala i bin witnesem merikel blong fet, tingting i stap daon, mo lav. Presiden Aji i soem wan lidasip wetem tingting i stap daon tru long eksampol P4 Liahona
blong hem. Sapos hem i gat inaf mane, bae hem i jiam long bas wetem famle blong hem blong kam long Jos. Sapos hem i no gat inaf mane, bae hem i wokbaot blong wan aoa haf blong kam long japel blong stap long fas intaviu blong hem long haf pas eit long moning, mo famle blong hem bae i kam afta long bas. Namba blong ol man we oli stap kam long Jos i go antap tri taem stat long taem we oli stanemap branj. I gat wan wido we i ruf blong smol haos blong hem i no naf blong blokem hem long ren long taem blong ren. Haos blong wido ia i stap antap long wan hil we i no gat tri blong haed andanit long hem. Wido ia i gat tingting i stap daon, mo hem i gat ol pikinini mo ol apupikinini, mo i stap fesem hadtaem. Wido ia i neva komplen. Taem Rilif Sosaeti presiden i harem long samting ia, hem i tokbaot wetem Branj Presidensi. Oli sendem Kworom blong Ol Elda blong go luk mo luk wanem i nid blong mekem blong mekem se smol haos blong hem i kam gud moa, mo blong karem praes long stoa blong fiksim haos. Oli stretem bajet, mo oli tokbaot long miting blong Branj Presidensi. Presiden Aji i askem se bae timba mo aean i rere wetaem, mo taem hem i harem se bae i rere long Tosdei, hem i ansa se: Okei. Bae yumi wokem long Fraedei. Hem i ren taem. Bae mi askem blong mi no wok, mo yufala tu i semmak. Long dei we oli bin jusum, nomata i bin stap ren, ol prishud brata oli klaem i go antap long hil wetem ol tul we i nid blong fiksim haos. Hemia nao fet mo testemoni blong Branj Presiden. Long taem blong ren, i mekem tingting blong mitufala i stap daon blong luk ol famle oli kam wetem ambrela nomo blong protektem olgeta long ren. Testemoni blong olgeta we i kam niu bakegen i mekem olgeta oli kam blong wosipim Papa blong olgeta we i stap long Heven, nomata i ren, i ren strong, o san i saen. Taem i ren, wanwan okseleri i faenem wan smol ples insaed long japel blong gat klas. Bae yu save harem ol defren hym we oli singsing long wan defren tiun long taem blong openem mo klosem miting. Oli setemap ol gol blong ol famle oli go long Suva Fiji Tempol blong oli sil, mo tu, blong wan riten misinari we i plan blong gat wan tempol mared blong maredem kompanion blong hem we i no save finis we i wan riten misinari tu. Elda Tom i talem: I gat wan memori we bae mi no save fogetem. I blong luk ol riten misinari we oli go long misin long ol yia 2000 i go kasem 2008. Ol brata ia, oli ol lesaktiv memba, we oli mared mo gat pikinini, mo naoia, oli kambak long Jos long ol las manis we i pas. Sakramen miting i las miting. Afta Sakramen miting, olgeta 12 riten misinari ia bae oli putum jea i go raon mo sidaon wetem ol niu konvet mo investigeta mo jes tokbaot misin eksperiens blong olgeta. Hemia i helpem mifala blong holemtaet 100 pesen blong ol niu konvet long tetaem ia. Ol memba we oli bin lesaktiv blong plante yia, oli kambak long Jos. Lod i stap muvum wok blong Hem i go hariap, mo Hem i mekem ol merikel. Ol Sista blong Samoa Oli Serem long Televisen Lav Ia we Oli Gat long Famle Histri Pago Pago, Ameriken Samoa Tagi Swingki mo Afiona Faumuina, tufala i bin wantem serem bigfala glad mo save blong tufala abaot famle histri wok wetem evriwan long Ameriken Samoa. Naoia, oli gat wan televisen program evri wik blong mekem samting ia. Liliu le Loto (Tanem Hat) i taetol blong haf aoa program we i kamaot long televisen long ol Tiusdei naet long KVZK. Hem i kam popula, mekem se televisen stesen i ripitim program ia long ol Mandei naet. Evri wik, i soem ol lokol pipol we oli toktok raon mo serem ol famle stori mo famle laen blong olgeta. Stat long taem ia, ol man Samoa oli save gud long ol bubu blong olgeta, mo hemia i risal from oli joen bakegen wetem ol famle blong olgeta we oli bin stap longwe. Afiona Faumuina i serem Oktoba 2014 P5
LAEBRI BLONG PABLIK AFEA I GLAD BLONG SEREM FOTO IA. famle histri blong hem long wan long ol fas program. Taem hem i mekem hemia, Tua NaseriSeve i luk wan nem we hem i luksave. Stret afta long program, hem i ringim televisen stesen mo i toktok wetem Afiona. Hem i eksplenem: Bubuman blong mi i bigfala brata blong bubuman blong hem, mo naoia, mitufala i serem sam moa infomesen bitwin mitufala. Sinaiese (Sina) Peleti, wan Katolik we i kam long Tafuna, i glad long wan long ol program ia. Hem i kam mo talem: Mi wantem faenemaot bubuwoman blong mi. Hem i putum taem blong go visitim Pago Pago Samoa Wes Stek Famle Histri Senta long nekis Satedei aftenun blong lukaotem famle blong hem. Hem i go sidaon long wan kompiuta skrin wetem Apelu Opelu, wan long ol konsalten blong famle histri senta, mo tugeta, oli luktru long famle histri websaet long intanet. Hem i smael gud taem hem i faenem papa mo mama blong hem. Oli gohed blong lukaotem bubuwoman long saed blong mama, mo i smael bigwan moa, we i soem se i gat sakses. Smol famle histri senta i gat kompiuta wetem intanet blong kasem famle histri saet, be tu, Sina Peleti (we i sidaon long medel) i kam long Pago Pago Samoa Wes Stek Famle Histri Senta blong faenem nem blong bubuwoman blong hem from hem i bin luk wan program long televisen we oli singaotem Liliu le Loto. i gat ol maekrofoto mo maekrofilm masin we i save ridim fulap pablik rekod we i abaot Ameriken Samoa. Senta i gat ol kopi blong hem abaot ol man Samoa blong mekem se olgeta we oli yusum senta oli save kasem infomesen kwiktaem. Taito Navualaba i wan man Fiji we i wok long kampani blong fis long Ameriken Samoa. Hem i no wan memba blong Jos mo mama blong hem i Katolik, mo papa blong hem i Metodis. Hem mo ol konsalten blong Famle Histri Senta oli tingting bigwan from se Taito i wan nem blong jif long Samoa. Oli bin wantem save se maet hem i gat wan bubu blong Samoa. Senta i sendem wan rikwes long Sol Lek Siti blong kasem wan maekrofoto blong ol famle laen rekod blong Fiji we bae i helpem hem. Tagi Swingke mo Afiona Faumuina, tufala i sista, mo tufala i memba blong Jos blong Jisas Kraes blong Ol Lata- dei Sent. Afiona i Famle Histri Daerekta blong Jos long Pago Pago Samoa Wes Stek, mo Tagi i wok long Pablik Afea long semfala stek ia. Tufala i biliv se famle histri i blong evriwan, nomata wanem relijin. Wan i talem:!yumi mas soemaot samting ia aotsaed! taem tufala i tokbaot evri gudfala tul we i stap tru long Jos long senta mo long intanet. Nao tufala i tingting:?olsem wanem long wan televisen program? Wanem i bin kam afta i famle histri. P6 Liahona
LAEBRI BLONG PABLIK AFEA I GLAD BLONG SEREM FOTO IA. Afiona Faumuina (L) motagi Swingke (R) tufala i sista; Tufala i serem lav blong mekem famle histri. Long ples ia, tufala i stanap long fored blong wan posta blong famle tri blong tufala long wan long ol famle histri faeasaed we oli bin holem long Ameriken Samoa. Afiona mo ol fren blong hem we oli wok long famle histri, oli mekem moa wok blong mekem evriwan i save luk ol rekod. Oli bin krietem wan databes blong ol nem, ol deit, mo infomesen we tufala i karemaot long ol maekrofilm mo maekrofoto we i abaot Ameriken Samoa mo Samoa. Wok i stap gohed yet, mo naoia i posibol blong lukaotem, long kompiuta, kolosap 200,000 nem, deit mo samting we i hapen aot long ol rekod ia. Oli stap ademap moa nem mo samting we i bin hapen evri wik. Long wan Satedei naet, Nambatri Leone Wod i holem wan Praemeri mo Yut miusik faeasaed, we oli singaotem Ia vala auliaaiga e o maifa atasi ia Keriso! (Singaotem ol famle blong kam long Kraes). Ol miusik oli kam long wanwan pikinini o yut, mama mo pikinini i singsing tugeta, wan Praemeri Kwaea, mo wan Yut Kwaea. Oli bin dekoretem aotsaed long mitinghaos wetem ol defren famle histri jat, foto, mo bubu jat we ol pikinini, ol yut, mo ol bigman oli bin mekem. Tagi mo Afiona, tufala i hapi mo stanap long fored blong famle posta blong tufala, mo stap rere blong serem glad blong tufala wetem ol narawan. Taem ol pipol oli ridim nem blong olgeta long ol famle bubu jat mo posta long ol taem olsem ia, oli mekem ol niu rilesensip plante taem. Long naet ia, wan senia misinari we i kam long Amerika i lukluk long posta blong Bisop Leiataua mo i talem: Elda Uati Leiataua i bin misinari kompanion blong mi long Samoa 43 yia i pas. Bisop i ansa wetem bigfala smael:!hem i smol brata blong mi! Blong faenem mo lanem abaot ol famle blong yumi, i wan impoten bilif blong Jos blong Jisas Kraes blong Ol Lata- dei Sent. Hem i wan gud samting blong mekem long fri taem we plante milian pipol raon long wol oli laekem blong mekem. Wan Toktok blong Waes... Prea I Bildimap Fasin blong Dipen long Yuwan long Saed blong Filing mo Spirit Prea i gud long sol, be tu, blong gudlaef blong tingting blong yu, hemia folem stadi blong wan bigfala grup blong sosol saens. Kaen prea we i wok gud moa i wan ones mo open storian wetem Papa long Heven (evri dei prea) mo i letem spes blong tingting hevi (prea we i tingtingbak). Presiden Monson i eksplenem se aksen i mas go Oktoba 2014 P7
wetem prea: Prea olsem se evri samting i dipen long God nomo, mo wok olsem se evri samting i dipen long yu nomo. Wan helti wei blong dipen long yuwan i blong yumi mas mekem evri samting we i stap long paoa blong yumi blong mitim nid blong yumi, mo afta, blong lanem olsem wanem blong kasem sam moa risos blong i fulumap hol we i stap. Yumi evriwan i nidim sapot mo givhan we i kam long ol narawan, we i tekem tu, sapot blong ol famle, ol fren, ol hom mo visiting tija, ol lida blong Rilif Sosaeti o Kworom, mo tu, plante narafala risos long komuniti blong yumi stat long medikol i go kasem edukesen seves. Antap long evri samting, yumi nidim wan rilesensip wetem Papa blong yumi we i stap long Heven mo Sevya, we yumi dipen long Tufala bigwan. Prea i wan tul blong helpem yumi blong developem fasin blong dipen long yumiwan long saed blong filing mo spirit taem yumi kasem paoa we i bitim paoa blong yumiwan, mo taem yumi kasem daereksen long wanem aksen yumi nid blong tekem. Yumi stap laef long wan wol we i leftemap tingting blong kasem tangkyu kwiktaem. Samtaem, yumi wantem ansa kwiktaem, o gat ansa blong problem blong laef. Presiden Peka i wonem ol lida blong Jos se oli mas lukaot gud blong no sakem nomo ol ansa long ol memba we oli lukaotem ansa. Taem oli mekem hemia, i mekem ol man mo woman oli nomo gat hadtaem blong gotru long hem, mo oli no gat janis ia blong nildaon blong faenem ansa mo daereksen we i kam long Papa blong olgeta long Heven. Rod ia blong traehad tru long prea, i developem paoa long saed blong spirit, i tijim yumi olsem wanem blong kasem revelesen, i mekem rilesensip blong yumi wetem Hae God i dip moa, mo mekem se i gat pis mo kamfot. Blong sendem nius i kam long Liahona mo Kantri Websaet pej Sapos yu gat eni stori we i promotem fet, o mekem testemoni i kam strong moa we mifala i save yusum insaed long magasin ia, o long lokol Jos websaet, plis imelem ol stori ia i kam long: liahona-pacific@ldschurch.org Ol stori oli mas gat samples 350 kasem 500 wod. Plis sendem tu ol infomesen ia: Nem blong man o woman we i raetem atikol Wan gud kwaliti foto sapos i gat Nem blong man o woman we i tekem foto mo raet blong yusum foto Wan sot toktok we i tokbaot wanem i stap long foto, wetem ful nem blong ol pipol long foto, mo raet blong olgeta blong oli pablisim foto BISLAMA P8 Liahona